Desisionan ti impeachment court ti Senado no surotenda wenno saan, ti pangngeddeng ti Korte Suprema (SC) a manglapped iti Senado a mangtaming iti articles of impeachment kontra ken ni Bise Presidente Sara Duterte.
Daytoy ti pinatalgedan ti panakangiwat ti impeachment court a ni Atty. Regie Tongol, ta paset dayta ti proseso a sursuroten dagiti senador maibatay iti pagalagadan ti Senado.
Kinompirmar ni Tongol a naawaten ti Senado ti kopia ti pangngeddeng ti SC babaen ti email, a naipatulod kadakuada idi rabii ti Hulio 25.
Inkeddeng ti SC a saan a mabalin a tamingen ti Senado ti articles of impeachment ta kinunana a linabsing dagiti kameng ti Kamara ti paglintegan a one-year ban iti impeachment.
Senado, pinasingkedanna ti ₱6.793-trilion a nailian a badiet para 2026
Segun ken ni Senate President Francis “Chiz” Escudero, masapul a pagsasaritaan dagiti senador ti ania man a pangngeddeng ti SC mainaig iti naipila a petision iti pannakausig ti bise presidente, a dinakamatna ti kaso nga impeachment daydi dati a SC Chief Justice Renato Corona.
Nupay kasta, kinuna ni Escudero a masapul a raemen ti pangngeddeng ti kangatuan a pangukoman.
Innayon ni Escudero a no mangipaulog ti Korte Suprema iti pangngeddeng, anamongan man wenno saan, agbalin daytoy a paset ti paglintegan ti pagilian.
Anamongan ni Sen. Panfilo “Ping” Lacson a rumbeng a desisionan a dagus ti Senado, kas maysa a collegial body, no ituloyda met laeng ti impeachment trial wenno saan.
Segun ken ni Lacson, saandan nga urayen ti motion for reconsideration nga ipila ti Kamara iti SC, no di ket desisionandan no agtuloy met laeng ti impeachment trial.
Kinuna ni Lacson a no ituloyda ti impeachment trial, ti agbalin a saludsod ket no ania ti hurisdiksion ti Senado idinto nga indeklarar ti SC nga imbalido ti articles of impeachment. Ngem no ituloy ti Senado ti impeachment trial, ikalinteganda nga addan huridiksion ti Senado ta narugiandan daytoy.
Innayon ni Lacson a gapu iti daytoy a dua a pilosopia, masapul nga umuman dagiti senador kadagiti eksperto iti linteg no ania ti rumbeng nga aramiden tapno maaywananda nga agdesision.
Ngem iti biang ni Lacson, masapul a raemen ti pangngeddeng ti SC, ta no saan, madadael ti makunkuna a "rule of law" iti pagilian. (Hannah L. Torregoza/Manila Bulletin//Lito Hilidon/Bannawag)
