Dinutokan ni Presidente Ferdinand Marcos Jr. ni Justice Mariflor Punzalan-Castillo a kas acting Ombudsman, segun iti Malakanyang, ita nga aldaw, Hulio 28.
Pinatalgedan daytoy ni Executive Secretary Lucas Bersamin babaen ti text message.
Temporario nga agakem ni Castillo iti saad ni Samuel Martires a nagretiron idi Hulio 27.
Kinuna ni Bersamin a rugianen ti Judicial and Bar Council (JBC) ti manginterbiu kadagiti agngayangay a kas Ombudsman kalpasan ti maikapat nga State of the Nation Address (SONA) ni Presidente Marcos itoy a malem (Hulio 28).
Senado, pinasingkedanna ti ₱6.793-trilion a nailian a badiet para 2026
Sakbay a nadutokan a kas officer-in-charge ti Office of the Ombudsman (OMB), nagserbi ni Castillo a kas 8th special prosecutor ti OMB ket agleppas koma ti terminona inton 2031.
Nangrugi ni Castillo a kas imbestigador ti Office of the Tanodbayan idi 1979 agingga 1985.
Idi 1989, naital-o ni Castillo a kas Special Prosecution Officer III iti Office of the Special Prosecutor ket nagserbi iti uppat a tawen.
Napan iti tay-ak ti hudikatura ket nagpaay a kas presiding judge ti Metropolitan Trial Court of Quezon City manipud 1993 agingga 1999, ken iti Regional Trial Court daytoy a siudad manipud 1999 agingga 2004.
Idi 2004, nadutokan ni Castillo a kas Associate Justice ti Court of Appeals (COA). (Ruth Abbey Gita-Carlos/PNA//Lito Hilidon/Bannawag)
