Kiniddaw dagiti opisial ti Baguio City ken Benguet ti komprehensibo nga estratehia tapno mataming ti kumarkaro a kasasaad ti Kennon Road gapu iti mabalin a naan-anay a pannakargaay ken pannakarba ti kabbaro a nabangon a rock shed (saripda iti agtinnag a batbato) gapu iti panagreggaay ti daga, awan pay makatawen kalpasan ti pannakaileppas daytoy.
Kinuna ni Benguet Rep. Eric Yap ita a Lunes, Hulio 28, a kiniddawda iti Department of Public Works and Highways (DPWH) ti madagdagus a pannakabukel ti short-term ken long-term a solusion tapno agtalinaed a silulukat ken natalged ti importante a kalsada.
Innayonna nga apaman a malpas ti sustainable plan ket agkiddaw iti national funding ken suporta ti Kongreso.
Iti kawatiwat ti Kennon Road a 33 a kilometro, nasurok a 25 a kilometro ti masakupan ti Benguet.
Senado, pinasingkedanna ti ₱6.793-trilion a nailian a badiet para 2026
Iti laksid a nagsagrap iti nakaro a pannakadadael gapu iti ginggined iti Luzon idi 1990, agtultuloy ti temporario a kasla “band-aid” a pannakatartarimaan ti Kennon Road, a ti kaudian ket ti rock shed a naaramid tapno masalakniban dagiti motorista manipud iti masansan a panagreggaay ti daga iti Sitio Camp 6 iti Barangay Camp 4.
Iti maysa nga interbiu, inulit Baguio City Mayor Benjamin Magalong ti madagdagus a pannakataming ti kalsada.
Ingganetgetna pay ti idea ii panag-audit tapno matingiting saan laeng a dagiti natural a banag a kas ti panagreggaay ti daga, ngem pati dagiti mabalin a biddut ti tao, a kas dagiti pagkurangan ti disenio ken dagiti kibaltang iti konstruksion, a mabalin a nakaigapuan ti dandanin pannakarsuod ti rock shed.
Insingasingna a mapagbalin a pribado ti Kennon Road tapno nasaysayaat a pannakatarawidwidna.
"Tapno mamantenertayo, rumbeng nga ipribadotayo daytoy ket maliklikan nga agbalin nga estruktura a panguartaan," kinunana. (PNA/MB)
