Kas ninamnama, nagun-od ni Leyte 1st district Rep. Martin Romualdez ti maikadua a terminona a kas speaker ti Kamara dagiti Mangibagi, ita a Lunes, Hulio 28, bayat ti pannakalukat ti umuna a regular session ti maika-20 a Kongreso.
Nakaala ni Romualdez, presidente ti dominante a partido a Lakas-Christian Muslim Democrats (Lakas-CMD), iti 269 a botos bayat ti plenario a sesion.
Ngem ti nominal voting--a nasurok a maysa nga oras a naaramid--ket pormalidad laengen gapu ta ni Romualdez ti kakaisuna a kameng ti Kamara a nainominar a para speaker bayat ti proceedings.
Kastoy met laeng ti napasamak tallo a tawenen ti napalabas, bayat ti pannakalukat ti maika-19 a Kongreso, idi nangabak met ni Romualdez nga speaker nga awan ti nanglaban.
Retirado a heneral, nakemmeg gapu iti panangsugsog a mangtippuog iti gobierno
Kasakbayan ti panagbotos iti kina-speaker, naipadamag a 293 manipud kadagiti 314 a kameng ti Kamara iti maika-20 a Kongreso ti nagpirma iti manipesto a mangsuportar iti agtultuloy a panangidaulo ni Romualdez iti Kamara.
Ni House Secretary General Reginald Velasco, a nangidaulo iti plenary session, ti nangideklarar ken ni Romualdez a kas duly-elected speaker kalpasan ti pannakabilang dagiti botos.
Nagserbi met ni Iloilo 3rd district Rep. Lorenz Defensor kas acting floor leader.
Iti imatang ti pamiliana, nagsapata ni Romualdez iti plenary rostrum iti sanguanan ni Bulacan 6th district Rep. Salvador Pleyto Sr. (Ellson Quismorio/MB)
