Mabalinna koma a di inkankano dagiti pangta ken panginsulto ket pinilina ti agbalin a kas "offcer and a gentleman" kas kangatuan a polis iti pagilian, ngem pinili ni Gen. Nicolas Torre III ti makilaban tapno maleksionan dagiti agtutubo a kaputotan dagiti Filipino maipapan iti panangsango kadagiti inawaganna iti bully (nalastog, napangas, naari).
“Namin-adu nga im-bully-nak dayta a tao,” kinuna ni Torre, a dakdakamatenna ni acting mayor ti Davao City Sebastian “Baste” Duterte.
Kinuna ni Torre a ti umuna a gundaway ket idi impangta ni Duterte a tungpaenna idi isuna ti regional director ti Police Regional Office 11, a nangrugi amin idi impatungpalna ti tallo a minuto a panagresponde ti polis iti Siudad ti Davao, a segun ken ni Tore ket saan nga inkabilangan ni Duterte nga isu idi ti mayor.
Ket dayta a pangta ti panangdangran, segun ken ni Torre, ket napasamak sakbay pay ti pannakaarestar ti lider ti Kingdom of Jesus Christ a ni Apollo Quiboloy idi Septiembre 2024.
Senado, pinasingkedanna ti ₱6.793-trilion a nailian a badiet para 2026
Nalagip a pinaikkat ni Torre dagiti police commander ti Siudad ti Davao gapu iti maipagarup a di umisu a panangireportda iti krimen tapno agparang a natalged ti lugar.
Kinuna ni Torre a nagtultuloy ti bullying manipud idin ken nagbalin pay a masansan kalpasan ti pannakaarestar ni Quiboloy ken pannakaibiahe ni dati a presidente Rodrigo Duterte iti The Hague, Netherlands.
Ngem nagpatinggan ti amin, ket iti kaudian a podcast ni Duter nga imbagana a kayatna a makadinnanogan ni Torre, inawat ti hepe ti PNP ti karit.
“Kas Chief PNP-yo, diak ipalubos nga asino man kadatayo ti i-bully lattan ti asino man uray ania ti kasasaadna, nangruna ti pananguyaw,” kinuna ni Torre, a dinakamatana ti imbaga ni Duterte, a nangawag a maysa a bakes wenno sunggo ni Torre.
“Diak ipalubos nga insultuennatayo ti asino man, diak panuynoyan dayta ket obligasiontayo a depensaan ti bagitayo, a depensaan ti bagitayo a kas Filipino. Poliskami ken sinapataanmi dayta a dikami umatras iti asino man a manggamsaw iti dignidadtayo,” innayonna.
Idi saan a nagparang a pulos ni Duterte iti lugar a pagboksinganda ken ni Torre, kinunana: "Nagtalapuagaw ti bully. Serraantayo ngaruden daytoy a kapitulo,” impaganetgetna. (Aaron Recuenco/MB)
