Tallo a senador ti nangipeksa iti dida pannakitunos iti pangngeddeng ti Korte Suprema a nangpasardeng iti konstitusional a pagrebbengan ti Senado a mangbista iti impeachment complaint kontra ken ni Bise Presidente Sara Duterte.
Iti nagtipon a palawagda, kinuna da Senador Risa Hontiveros, Bam Aquino, ken Francis "Kiko" Pangilinan a sinurot ti Kongreso, nga agtigtignay iti naimbag a nakem ken mangan-annurot iti adda a jurisprudence, ti linteg iti panangirugi ken panangyallatiwda iti impeachment complaint iti Senado.
"Ti retroaktibo a panangyaplikar iti baro a depinision no ania ti kaipapanan ti “mangirugi” iti kaso ti impeachment--kalpasan ti fact--ket mabalin a maipada iti panangbalbaliw kadagiti pagannurotan iti katengngaan ti ay-ayam. Saan a patas daytoy," kinunada.
Ti dati a Justice ti Korte Suprema a ni Adolfo Azcuna, a maysa a mararaem a konstitusionalista ken maysa kadagiti nangbukel iti Konstitusion, inawaganna ti desision ti SC iti no ania daytoy: legal a maidepensa, nalabit, ngem nakaro unay a saan a nainkalintegan.
Senado, pinasingkedanna ti ₱6.793-trilion a nailian a badiet para 2026
Dinagadag da Hontiveros ti SC nga irekonsiderar daytoy ti desisionna ket yaplikarna ti dua a prinsipio a nabayagen nga itantandudona:
Ti Prinsipio ti Kinapatas — a ti retroaktibo a pannakayaplikar dagiti baro a legal nga interpretasion ket saan koma a mangdangran kadagiti nagpannuray iti naimbag a nakem kadagiti daan a legal nga interpretasion; ken
Ti Doktrina dagiti Operatibo a Kinapudno — a dagiti panagtignay a naaramiden iti sidong ti kasakbayan ken balido nga interpretasion ket rumbeng a mabigbig a kas legal nga epektibo.
Iti panangaramidna iti dayta, saan dadaelen ti Korte ti pannakabalinna a mangrepaso, no di ket mangted iti naan-anay nga epekto kadagiti amin a sanga ti gobierno, a maitunos iti doktrina a naipasdek iti Civil Liberties Union vs. Executive Secretary--nga awan koma ti probision ti Konstitusion a mabasa iti wagas a mangbarengbareng iti sabali a probision. Masapul a maipaay amin ti umno ken natimbeng nga epekto dagiti bileg ti Korte, ti Kamara dagiti Mangibagi, ken ti Senado.
Innayonda a saanda laeng a nagsapata tapno masalaknibanda dagiti posision babaen dagiti teknikalidad no di ket nagsapatada a mangsalaknib iti Konstitusion--ken iti karbengan ti tunggal Filipino a mangikalikagum iti kinapudno ken hustisia.
"No palubosantayo nga agtakder daytoy a precedent, adda risgo a pagulimekentayo ti mismo a proseso a nairanta a mangtaginayon iti pannakabantay ti bileg ti panagturay," kinunada.
"Kiddawenmi kadagiti padatayo nga umili, iti tunggal institusion a mamati pay laeng iti accountability, ken iti Korte Suprema a mismo: pagtunosen dagiti kas man agsusupadi a probision ti Konstitusion maipapan iti Judicial review ken dagiti eksklusibo a bileg ti Kongreso," innayonda. (Dhel Nazario/MB)
