Dinayaw da Senador Sherwin Gatchalian ken Bam Aquino ti panagkumit ni Presidente Ferdinand R. Marcos Jr. iti pannakaipangpangruna ti reporma iti edukasion, kas maysa nga addang iti panangtaming iti giwang iti sistema ti panagadal.
Iti State of the Nation Address (SONA) idi Hulio 28, pinasingkedan ni Marcos a ti edukasion latta ti umuna a prioridad ti administrasionna, ket dinakamatna dagiti maar-aramid a pannakarepormar tapno mataming ti giwang iti panagadal, mapasayaat ti kasasaad ti mannursuro, ken mangpatibker iti pamunganayan a panagadal.
Dinakamatna ti pannakaipatungpal ti Academic Recovery and Accessible Learning (ARAL) Program ken ti pannakaisaknap ti programa nga Early Childhood Care and Development (ECCD)--a naiabatay iti linteg nga impaulog ti Kongreso.
Nagkumit ni Marcos iti pannakaipatakder ti 300 a Barangay Child Development Centers ken Bulilit Centers, nga addaan iti pondo a ₱1 a bilion tapno mataming ti panagkurang ti pasilidad ti daycare.
Senado, pinasingkedanna ti ₱6.793-trilion a nailian a badiet para 2026
Tapno masaluadan ti mental ken pisikal a pagimbagan dagiti estudiante ken mannursuro, insayangkat ni Marcos ti YAKAP Caravan a mangipaay iti libre nga agas, medical check-up, ken laboratory tests.
Dinakamat pay ni Marcos ti pannakalukat ti 22,000 a classroom iti las-ud ti tallo a tawen ken inkarina a mangipatakder pay iti 40,000 a classroom babaen ti tulong ti Kongreso ken pribado a sektor.
Impasigurado ni Marcos ti umisu a pannakagatang dagiti laptop, digital nga alikamen, ken connectivity support para kadagiti mannursuro ken estudiante.
Addan 60,000 a mannursuro a nainayon ken maikkat metten dagiti para administratibo a trabaho dagiti mannursuro.
Malaksid kadagitoy, inkari ni Marcos nga agtultuloy a maponduan ti libre a tuition kadagiti state university ken umadu ti scholarship iti TESDA ken estudiante iti kolehio, nangruna dagiti benipisiario ti Pantawid Pamilyang Pilipino Program (4Ps).
Segun ken ni Gatchalian, dagiti sinao ni Presidente Marcos iti SONA ti mangipakita iti gandatna mangpapigsa ti pamunganayan nga edukasion ken masigurado ti naan-anay a pannakaipatungpal ti agdama a linteg.
Kinuna met ni Aquino, daulo ti Senate Committee on Basic Education, a maragsakan iti nangngegna nga ipangruna ni Presidente Marcos ti edukasion, ket siguraduenna a matungpal dagiti inkarina a reporma iti edukasion. (Wilnard Bacelonia/PNA//Lito Hilidon/Bannawag)
