Impila ti National Police Commission (Napolcom) ti administrative charges a naipila kontra iti tallo nga opisial ti polis ken siam pay a polis mainaig iti pannakapukpukaw dagiti "sabungeros" wenno mammallot, kalpasan a napasingkedanda ti probable cause.
Maidarum dagiti 12 a polis iti Grave Misconduct and Conduct Unbecoming of an Officer, segun iti chairman ken executive officer ti Napolcom a ni Rafael Vicente Calinisan, ket urayenda ti sungbat dagiti polis a nairaman kas paset ti due process.
“Maikkanda iti panawen a mangipila iti sungbatda kalpasanna, addanto dagiti maiwayat a hearing,” kinuna ni Calinisan.
“Iti babaen dagiti pagannurotan, mabalintayo nga ibilin ti preventive suspension dagiti nairaman a polis. Isu nga aguraytayo nga umuna. Diak kayat a sakbayan ti ania man nga aksion nga aramiden ti Napolcom ngem maysa dayta a pagpilian a mabalin nga ikonsiderar ti Napolcom,” innayonna.
Senado, pinasingkedanna ti ₱6.793-trilion a nailian a badiet para 2026
Naipila dagiti kaso nga administratibo babaen ti whistleblower a ni Julie Patidongan, alias “Totoy” ken dagiti kabagian dagiti mapukpukaw a mammallot, a mapapati a naibelleng dagiti bangkayda iti Taal Lake.
Mairaman kadagiti respondent dagiti police officer nga addaan iti ranggo a colonel, lieutenant colonel, ken major, ken siam pay a non-commissioned officers a walo kadagitoy ket police sergeant.
Segun ken ni Edman Pares, direktor ti Inspection Monitoring and Investigation Service ti Napolcom, napigsa ti apidabit nga inted ni Patidongan a mangipatalged iti kaso nga administratibo.
Addaan iti maximum penalty a pannakaikkat iti serbisio ken pannakawaswas ti retirement benefits dagiti kaso a naipila kadagiti 12 a polis. (Aaron Recuenco/MANILA BULLETIN)
