Dinayaw dagiti senador ti nainget a bilin ni Presidente Ferdinand Marcos Jr. a pannakasukimat ken pannakarepaso dagiti amin a flood control project kalpasan ti pannakalayus ti adu a Filipino iti naglabas a lawas.
Pinadayawan ni Senate Majority Leader Sen. Joel Villanueva ti presidente iti daytoy a sinaona ken ti nainget a bilinna maipapan kadagiti flood control project.
Anamongan met ni Sen. Paolo “Bam” Aquino IV daytoy a pammilin ni Marcos, ket kunana a masapul a maammuan ti nakaipanan dagiti pondo wenno no pudno a nausar met laeng dagitoy para iti panangkontrol iti layus.
Kinuna ni Sen. Joseph Victor “JV” Ejercito a mailatang dayta a trabaho kadagiti maseknan nga ahensia kas iti Department of Public Works and Highways (DPWH) tapno masigurado a saan laeng a para pabuya ti audit, no di ket agtun-oy daytoy iti pannakadusa dagiti nakabasol ken reporma.
Senado, pinasingkedanna ti ₱6.793-trilion a nailian a badiet para 2026
Iti biang ni Sen. Panfilo “Ping” Lacson, magustuanna ti imbilin ni Marcos a matingiting dagiti amin a flood control project ken ti imbagana a dina pirmaan ti 2026 national budget no Saan a maitunos iti National Expenditure Program (NEP) ti gobierno.
Mapnek met ni Senate Minority Leader Sen. Vicente "Tito" Sotto III iti panangballaag ni Marcos iti panagkunniber iti DPWH, ken magustuanna met ti kinuna ti presidente a panangtaginayon iti NEP iti panangbukel iti nailian a badiet. (Hannah L. Torregoza and Dhel Nazario/Manila Bulletin//Lito Hilidon/Bannawag)
