Pinakdaaran ni Presidente Ferdinand Marcos Jr. ti Kongreso a dina aprobaran ti 2026 national budget no aglabsing daytoy iti National Expenditure Program (NEP) ti gobierno, uray agtungpal daytoy iti reenacted budget
Daytoy ti kinuna ni Marcos kalpasan ti panangbabalawna iti panagkunniber ken saan nga epektibo nga impraestruktura, nangruna dagiti proyekto a flood control a narpuog, narba, wenno pulos a saan a naipatakder.
Iti maikapat nga State of the Nation Address (SONA) nga indatagna idi Hulio 28, pinakdaaran ti presidente dagiti kameng ti Kongreso a dina pirmaan ti badiet a di maitunos iti prioridad ti gobierno.
Segun iti presidente, nakitana no kasano nga apektaran ti panagkunniber ti biag dagiti umili, nangruna ta nagsasaruno dagiti bagyo ken abagat (southwest monsoon) a nangbegbeg iti nadumaduma a paset ti pagilian itoy a bulan.
DOH, namakdaar iti posible a pannakadangran iti Traslacion
Nupay maim-imbestigaren dagiti anomalia iti flood control project, binabalaw ni Marcos ti sistematiko a pananggundaway kadagiti proyekto ti gobierno, ket kinunana a di rumbeng a mausar ti pondo ti gobierno para iti personal ken politikal a gandat ti asino man.
Kinuna ni Marcos a ti kampaniana a maibusor iti panagkunniber ti direkta a mangimpluensia iti panangbukelda iti national budget.
Ti NEP, a kadawyan nga idatag ti Department of Budget and Management (DBM) apaman nga aprobaran ti presidente, ti mangbalabala iti prioridad ti administrasion iti pondo ken pagbatayan ti Kongreso a mangbukel iti nailian a badiet. (Argyll Cyrus Geducos/Manila Bulletin//Lito Hilidon/Bannawag)
