Sinupiat ni Senate President Francis "Chiz" Escudero ita nga aldaw, Hulio 29, ti imbilangna a saan a patas ken napolitikaan a pammabasol kontra kenkuana mainaig iti panangbalbaliw iti national budget.
Iti maysa a press conference, kinuna ni Escudero a dagitoy nga alegasion ket biddut a panangipagarup a ti pannakarebisar iti singasing a badiet ket maibilang nga "illegal insertion."
"Nakaro met ngamin ti ibagbaga dagiti mangperperdi, amendaran laeng ti badiet, illegal a dagusen, maipariten a dagus, nagganansian a dagus. Biddut dayta," kuna ni Escudero.
Kinuestion ti daulo ti Senado ti lohika dagiti mangbabbabalaw iti akem ti Kongreso iti panangbukel iti badiet ken impaganetgetna a palubosan ti Konstitusion dagiti mammanday-linteg a mangbaliw iti General Appropriations Bill (GAB).
DOH, namakdaar iti posible a pannakadangran iti Traslacion
Inlawlawag ni Escudero a saan a ti panangamendar iti badiet ti illegal no di ket ti "pork barrel" system, nga inikkaten ti Korte Suprema.
Kinuna ni Escudero a dagiti alegasion a nanginaig kenkuana iti kuestionable a proyekto ket nairanta tapno malapdan ti pannakapilina a kas daulo ti Senado, ngem saan a nagballigi dagiti akin-aramid iti daytoy. (Dhel Nazario/Manila Bulletin//Lito Hilidon/Bannawag)
