Pinatibker pay ti Armed Forces of the Philippines (AFP) ti pannakikaduana iti seguridad iti Estados Unidos (US) ken Japan ita Hulio 29, babaen ti nangato nga agpang ti pannakiuman a mangpapigsa iti panagtinnulong iti rehion, pannakapabaro ti militar, ken panagtinnulongda.
Indauluan ni AFP Chief General Romeo Brawner Jr. ti maysa a virtual meeting a kasaritana ni Secretary of the Air Force ti US a ni Dr. Troy E. Meink iti isasarungkarna iti Camp Aguinaldo iti Quezon City, ken da General Yoshihide Yoshida ken General Hiroaki Uchikura a Chief of Staff ti Japan Self-Defense Forces (JSDF).
Maysa pay a taripnong ti naangay iti Philippine Air Force (PAF) headquarters iti Villamor Air Base iti Pasay City iti nagbaetan da Meink ken ni PAF Commanding General Lt. Gen. Arthur M. Cordura, a nangpatibker pay iti panagtinnulong ti dua a pagilian iti depensa iti tangatang.
Segun iti AFP, pinasingkedan dagiti amin a partido ti panagkumitda iti siwawaya, silulukat, ken maibatay iti linteg nga Indo-Pacific region, a mangipaspasimudaag a nagkaykaysa dagiti tallo a pagilian a mangsaranget iti ania man a naranggas a tignay kadagiti mapagsusupiatan a kadanuman, nangruna iti West Philippine Sea (WPS). (Martin Sadongdong/Manila Bulletin//Lito Hilidon/Bannawag)
