Nagballaag ti Philippine Institute of Volcanology and Seismology (Phivolcs) iti yaay ti tsunami kalpasan ti ginggined iti uneg ti baybay iti daya ti Kamchatka, Russia, ita nga aldaw, Hulio 30, nga addaan 8.7 a magnitude (kapigsa).
Segun iti Phivolcs, napasamak ti gingginned itay 7:25 iti agsapa (oras iti Filipinas).
Maibatay iti Pacific Tsunami Warning Center, kinuna ti Phivolcs a dagiti tsunami a di nababbaba ngem iti 1 metro ti manamnama a mangapektar iti baybay ti Filipinas a nakasango iti Pacific Ocean.
Mapattapatta a dumteng dagiti umuna a tsunami iti baet ti 1:20 ken 2:40 iti malem (PST).
Retirado a heneral, nakemmeg gapu iti panangsugsog a mangtippuog iti gobierno
Imballaag ti Phivolcs a saan met unay a dakkel dagiti allon ken mabalin nga agpaut ti tsunami iti sumagmamano nga oras.
Binallaagan ti Phivolcs ti publiko nga agridam ken umadayo iti baybay dagiti umili kadagiti sumaganad a probinsia:
* Luzon: Batanes Group of Islands, Cagayan, Isabela, Aurora, Quezon, Camarines Norte, Camarines Sur, Albay, Sorsogon, ken Catanduanes
* Visayas: Northern Samar, Eastern Samar, Leyte, ken Southern Leyte
* Mindanao: Dinagat Islands, Surigao del Norte, Surigao del Sur, Davao de Oro, Davao del Norte, Davao Oriental, Davao Occidental, ken Davao del Sur
Pinakdaaran pay ti Phivolcs dagiti akinkukua iti pantalan, sabangan, ken nababa a dandanum iti igid ti baybay a yadayoda dagiti barko iti igid ti baybay.
Agtalinaed dayta a ballaag ti Phivolcs agingga a saanda a waswasen daytoy. (Ellalyn De Vera-Ruiz/Manila Bulletin//Lito Hilidon/Bannawag)
