Agtataripnong dagiti militante a Palestinian Hamas iti lugar a nakayawatan dagiti bangkay dagiti uppat nga Israeli hostage iti Khan Younis iti abagatan a Gaza idi Pebrero 20, 2025. (Eyad Baba/AFP via Getty Images)

Iti umuna a gundaway, nagkaykaysa dagiti pagilian wenno estado nga Arabo ken Muslim a pakairamanan ti Qatar, Saudi Arabia, ken Egypt a nangipaulog iti nagtitipon nga awag para iti Hamas nga agdis-armar ken ibbatandan ti panagturayda iti Gaza Strip kas paset ti pannakaiganetget a mamagpatingga iti gubat iti nasao a teritorio.

Sinuportaran ti 22 a miembro nga Arab League, ken ti entero nga European Union ken sabali pay a 17 a pagilian ti deklarasion a napirmaan iti maysa a komperensia ti United Nations a nagkaduaan a sinangaili ti Saudi Arabia ken France idi Martes, Hulio 29.

Panggep ti panagtataripnong a tamingen “ti natalna a pannakarisut ti isyu maipapan iti Palestina ken ti pannakaipatungpal ti Two-State Solution,” ket inwayat ti deklarasion no ania dagiti addang a pagarupen dagiti nagpirma a rumbeng a sumaruno a maaramid.

“Ti panagturay, pannakaipatungpal ti linteg ken seguridad iti entero a teritorio ti Palestina ket nasken a pakaseknan laeng ti Palestinian Authority, nga addaan iti maitutop nga internasional a suporta,” kuna ti napagtitipon a dokumento, ken innayonna nga “iti konteksto ti panagpatingga ti gubat iti Gaza, nasken nga ipatinggan ti Hamas iti panagturayna iti Gaza ken itedna dagiti armasna iti Palestinian Authority, nga addaan iti internasional a pannakilangen ken suporta, kas maitunos iti panggep ti maysa a soberano ken agwaywayas nga Estado ti Palestina.”

Internasional

Damag nga adda OFW a nairaman iti uram iti Hong Kong, im-imbestigaren ti DFA

Kinondenar met ti teksto ti adu't napapatayna a panangraut ti Hamas iti Israel idi Oktubre 7, 2023, ken insingasingna ti pannakaipakat ti “temporario nga international stabilization mission” kas yawis ti Palestinian Authority ken “iti sidong ti panangiwanwan ti United Nations.”

Nupay kasta, awan ti impasimudaag ti Hamas a pagilasinan a mangisuko iti turay iti Gaza Strip.

Sipipinget met a kinontra ni Prime Ministerr ti Israel Benjamin Netanyahu ti two-tate solution, nga inkalinteganna a saan a maitunos daytoy iti seguridad ti pagilianna. (Nadeen Ebrahim/Associated Press)