Nagsarita da Sekretario ti Department of Transportation (DOTr) Vince Dizon ken Pasig City Mayor Vico Sotto idi Hulio 30 tapno risutenda ti parikut iti right-of-way (ROW) a mangitantan iti pannakaipatakder ti Ortigas Station ti Metro Manila Subway Project (MMSP).
Iti panangsukimat ni Dizon iti pakaipatakderan ti Ortigas Station ti MMSP, kinunana a paset daytoy ti bilin ni Presidente Marcos a mangiringpas kadagiti kangrunaan a proyekto ti administrasion.
"Ita, naguummongkami ditoy a mangsapul iti solusion. Sapay koma ta kalpasan ti sumagmamano a lawas, marugianen ti a maipatakder (ti proyekto)," kuna ni Dizon a kinuyog ni Sotto a nag-inspeksion.
Iti sabali a bangir, nagyaman ni Sotto iti DOTr ken indiayana ti tulong ti gobierno ti siudad iti pannakapapardas ti pannakaaramid ti proyekto, idinto a padpadaananda daytoy subway.
Senado, pinasingkedanna ti ₱6.793-trilion a nailian a badiet para 2026
Idi Hulio 17, binilin ni Dizon dagit contractor ti MMSP a papardasenda ti pannakaipatakder ti aggatad P488.5 a bilion a subway project tapno mapalag-an ti panagbiahe ti rinibu a pasahero iti National Capital Region.
No mairingpas ti 37-kilometro ken 17 ti estasionna a subway, mapapardas ti biahe manipud Quezon City agingga iti Ninoy Aquino International Airport (NAIA) iti Pasay City ket agbalin laengen a 45 a minuto. (Raymond Carl Dela Cruz/PNA//Lito Hilidon/Bannawag)
