Ilunglungalong ni Senador Panfilo Lacson ti Anti-Political Dynasty Act, a mangtungpal iti probision ti 1987 Constitution a mangsigurado iti agpapada a gundaway iti panagakem iti gobierno ken mangiparit iti political dynasty.
Segun ken ni Lacson, nupay bigbigen ti Estado dagiti saan a nasayaat nga epekto ti political dynasty, awan ti linteg a mangpabileg iti pannakaiparit daytoy iti beddeng ti politika.
Iti maysa nga innuman idi Hulio 30, inlawlawag ni Lacson a ti Senate Bill (SB) No. 35 a napauluan iti "The Anti-Political Dynasty Act of 2025" ti mangiparit iti asawa wenno kabagian (nga adda iti second degree of consanguinity wenno affinity) ti agdama nga opisial nga agngayangay manen kas opisial ti isu met laeng nga ili, siudad, wenno probinsia iti isu met lang nga eleksion.
Mairaman pay iti first ken second degree of consanguinity a kabagian dagiti nagannak, kakabsat, annak, appoko, ken aapong (grandparents).
Senado, pinasingkedanna ti ₱6.793-trilion a nailian a badiet para 2026
Kinuna ni Lacson a maiparit ti asawa wenno wenno kabagian (nga adda iti second degree of consanguinity wenno affinity)--legitimate man wenno illegitimate, full blood wenno half blood--ti agdama nga opisial a pabotosan manen, a mangakem wenno agngayangay a kas opisial iti isu met laeng a siudad ken/wenno probinsia iti isu met laeng nga eleksion.
Iparit met ti SB No. 35 ti dua wenno ad-adu pay a tao a kabagian ti political dynasty, nga aggiddan nga agkandidato iti ania man nga elective office iti isu met laeng a siudad ken/wenno probinsia, uray awan ti kabagianda nga agdama nga opisial ti gobierno.
Segun ken ni Lacson, panggep ti SB No. 35 a timbengen ti dua nga agkasungani a prinsipio ti panagturay ti electorate (wenno dagiti botante) ken political dynasty.
Innayon ni Lacson a dagiti nabileg a puli ken pamilia a nagramuten iti benneg ti politika a pinagbalindan ti panagakem iti gobierno a kas pagay-ayamanda, a nagtungpal iti panagsaknap dagiti "babassit a pagarian" iti entero a pagilian, ket daytoy ti mangbarengbareng iti rumbeng koma nga agpapada a gundaway iti politika, ken mangitandudo kadagiti di panagpapada iti politika.
Inawat ni Lacson ti akem a kas daulo ti Committee on Electoral Reforms and People's Participation ti Senado kalpasan nga indiaya daytoy ni Senate President Francis Escudero kenkuana. (PNA/Lito Hilidon/Bannawag)
