Pimmusay ni mannurat ti Bannawag Virgilio S. Naungayan ti Brgy. Darapidap, Siudad ti Candon, idi Hulio 27, 2025. Agtawen iti 70.
Kas mannurat, masansan nga ar-aramatenna ti nagan ti barangayna a Darapidap kadagiti sursuratenna. Adun a sarita ken daniw ti naipablaakna iti Bannawag ken Liwayway.
Kas premiado a mannurat, mairaman dagitoy kadagiti pinangabakna: “Toribio de Palaca” iti Don Pacioles Awards for Iluko Literature idi tawen 2007 ken “Lapat” iti 7th Reynald F. Antonio Awards for Iluko Literature idi 2009, agpada a nangyalat iti Umuna Gunggona.
Maysa kadagiti kaudian a nangabakanna ti Salip iti Sarita ti 3rd Mario Abinsay Albalos Foundation Literary Awards idi 2019 babaen ti saritana a “Walking Dead” a nangyalat iti Maikatlo a Gunggona.
Nabotosan, baro nga opisial ti Ilocos Sur Provincial Capitol Press Corps
Dinto met malipatan dagitoy sumaganad a saritana: “Anak ti Agbibirot,” “Prinsesa Dagiti Arinola,” ”Dalluyon iti Darapidap,” kdp.
Adda maysa a librona a napauluan iti “Igid ti Baybay ken Napili a Sarita” a nakaipalaonan ti kaaduan a saritana.
Kaaduan met kadagiti daniwna ti naibasbasa iti radio no di man impaspaskilna iti Facebook.
Nagtakem pay a Kagawad ti barangayda ken nagpaay a mannursuro iti uneg ti 18 a tawen (nagretiro idi 2016).
Naipasngay idi Agosto 13, 1954. Inleppasna ti Bachelor of Science in Elementary Education iti tawenna a 41 iti CCC-UNP idi 1995. Inulilana ti kaingungotna a ni Marilou ken ti anakda a ni Virmar, agraman dagiti kakabsatna a da Iniang, Lourdes, ken Herosalima.
Maitabon inton Agosto 9, Sabado, sumagmamano nga aldaw sakbay iti kasangayna.
