Kayat ni dati a presidente Rodrigo Duterte a pasardengen ti dati a pannakangiwatna a ni Harry Roque a makibiang iti kasona a crimes against humanity iti International Criminal Court (ICC), ta amangan no pagpeggaden ni Roque ti depensana.
Daytoy ti imbutaktak ti abogado ni Duterte a ni Nicholas Kaufman iti pananginterbiu kenkuana ti maysa a pro-Duterte blogger a ni Alvin and Tourism. Naited ti transcript ti interbiu kadagiti kameng ti media idi Hulio 30.
"Ti dati a presidente, agraman dagiti tao nga adda iti asidegna, saanda nga interesado ken ni Harry Roque nga abogado," kuna ni Kaufman.
Segun ken ni Kaufman, impakaammo ti dati a presidente a rumbeng nga isardeng ni Roque ti pannakibiangna iti kaso ket agsubli laengen daytoy iti Filipinas tapno sanguenna dagiti bukodna a legal a parikut.
Phivolcs: Bulkan Mayon, nagtalinaed nga aktibo
Binabalaw ni Kaufman ni Roque gapu iti panagtignay daytoy iti bukodna a legal nga aksion--nga idarumna kano ti gobierno a Dutch gapu iti panangpasangbayda iti extradition ti dati a presidente iti The Hague--a mabalin a mamagpeggad iti interim release ni Duterte iti ICC detention.
Kinuna ni Kaufman a minamauyong daytoy nga estratehia ta iti pannakawayawaya ni Duterte, kasapulanda ti kooperasion ti gobierno a Dutch--banag a saanen a maaramid no idarum ida ti tao a maseknan.
Ngem kinuna ni Kaufman nga ipilit latta ni Roque ti kapanunotanna agingga a nagbalinen daytoy nga obsesado, ngem iti daytoy a planona, mabalin nga agpeggad ti estratehia ti depensa iti kiddawda a mawayawayaan ni Duterte.
Innayon ni Kaufman nga iti damo pay laeng, ipakpakitan ni Roque a kasla isuna laeng ti makabael a mangdepensa ken ni Duterte.
Binalakadanna ni Roque nga ibubosna ketdi ti kabaelanna iti panagapelarna iti naipadamag a panangwaswas ti Netherlands iti refugee status daytoy. (Raymund Antonio/Manila Bulletin//Lito Hilidon/Bannawag)
