Ipatungpal ti Social Security System (SSS) ti maysa a programa para iti reporma ti pension (pension reform program wenno PRP) a mangrugi iti Septiembre itoy a tawen, a mangted iti nangatngato a binulan a pension kadagiti retirado ken addaan banay (disability) a benepisiario.
In-inut a maikadakkel ti pension iti tinawen agingga iti maabotna ti 33 a porsiento a ngatuan iti uneg ti tallo a tawen mangrugi iti Septiembre 2025 agingga iti 2027 idinto nga umawat met dagiti death wenno survivor pensioners iti 16-porsiento a ngatuan ti pension.
Iti pakaammo ti SSS itoy nga aldaw, Hulio 31, 2025, kunana a sungbat daytoy ti nabayagen a kiddaw a pannakaipangato koma ti pension.
Maibatay met laeng daytoy a pangngeddeng ti SSS iti Social Security Act of 2018 a nangited iti SSS iti bileg a mangipangato iti pension.
