Binigbig ti Mines and Geosciences Bureau (MGB) ti Department of Environment and Natural Resources (DENR) ti 205 a barangay iti Ilocos Sur a nalaka a maapektaran ti layus ken panagreggaay ti daga no panawen ti tudtudo ken bagyo.
"Agalertokayo koma ken tumulong a mangmonitor kadagiti lugaryo para kadagiti posible a panagreggaay ti daga, panaglayus, wenno panagayus ti pitak," kinuna ti MGB iti maysa nga statement idi Hulio 31, bayat nga agtultuloy ti panagtudtudona pay laeng iti probinsia.
Kinuna ti MGB a kadagiti kallabes a panagdawel ti panawen, naslep ti daga isu a nalaka a margaay nangruna kadagiti bakras wenno katurodan.
Iti interview ti media, kinuna ni Laurence Mina, Regional Disaster Risk Reduction and Management Council chairperson ken regional director ti Office of Civil Defense (OCD), a nabilin dagiti lokal a disaster response unit nga agtalinaed a naridam ken nakasagana a mangipatungpal iti mandatory evacuation no kasapulan.
TAO, LUGAR, PASAMAK: Sadiay Salomague
"Sapay koma ta dagitoy a tudo ket saanen a mangtignay iti layus ngem agtalinaedtayo a naridam," kinunana. "Naslepen ti daga gapu kadagiti napigsa a tudo."
Kinuna ni Mina a nakikokoordinarda kadagiti maseknan nga autoridad para iti pannakausar dagiti air asset tapno madanon dagiti isolated resident iti Sugpon, Ilocos Sur tapno masigurado ti kinatalgedda ken maitulod dagiti food pack ken generator sets.
Segun iti kaudian a datos ti OCD, agdagup iti 4,436 a pamilia wenno 17,000 a tattao iti entero a rehion ti adda pay laeng kadagiti evacuation center agingga idi Hulio 31. Kaaduan kadagitoy ti naggapu kadagiti nababa a lugar ti Pangasinan, La Union, ken iti abagatan a paset ti Ilocos Sur.
Agarup 2,400 a pamilia wenno 24,000 a tattao met ti umaw-awat iti tulong ti gobierno ken temporario a nagkamang iti sabali a lugar, kinuna ti report ti OCD.
Kinuna met ni Ivy May Graycochea, geologist manipud iti Geosciences Division ti MGB Ilocos Region, saan koma a palubosan dagiti local government unit nga agsubli dagiti evacuee kadagiti landslide-prone area nga awan ti clearance manipud kadagiti autoridad.
"Saan koma a mapalubosan dagiti residente nga agsubli kadagiti lugar a yan ti panagreggaay ti daga agingga a pasingkedan dagiti autoridad a natalged daytoy," kinunana.
Kinunana pay a no mabalin, masapul a maikkat dagiti nakabangen kadagiti pagayusan ti karayan tapno masigurado ti nawaya a panagayus ti danum ken maliklikan ti panaglayus kadagiti nababa a komunidad. (Leilanie Adriano/PNA)
