Impila dagiti pamilia dagiti mapukpukaw a “sabungeros” wenno mammallot ti kaso a kriminal iti Department of Justice (DOJ) kontra ken ni negosiante a Charlie “Atong” Ang ken sumagmamano pay a tattao.
Kinuna ni Charlene Lasco, kabsat ti maysa kadagiti “sabungero” a ni Ricardo Lasco, a nangipila isuna ken ti dadduma pay a pamilia dagiti biktima iti kaso a multiple murder ken serious illegal detention kontra ken ni Ang ken dadduma pay a respondent.
Segun ken ni Lasco, kinasuanda ni Ang a nabayagen a suspetsada a responsable iti panagpukaw ken mapapati a pannakapapatay dagiti biktima.
Innayonna a dagiti dadduma pay nga akusado ket pakairamanan dagiti polis, a saan a naipalgak dagiti naganda.
Senado, pinasingkedanna ti ₱6.793-trilion a nailian a badiet para 2026
Iti pannakaipila dagiti kaso, mangdutok ti DOJ iti panel of prosecutors a mangisayangkat iti preliminary investigation a mangikeddeng no rumbeng a maipila ti kaso iti korte kontra ken ni Ang ken dagiti kakaduana a respondent.
“Ti prosecution panel a talaga ti mangikeddeng no ania ti umisu a maaramid kadagiti reklamo a naipila ita nga aldaw (Agosto 1),” kinuna ni Justice Secretary Jesus Crispin C. Remulla.
Impasigurado ni Remulla kadagiti respondent a nainaganan kadagiti reklamo a masurot ti due process. (Jeff Damicog/Manila Bulletin)
