Inlawlawag ni Nicholas Kaufman, abogado ni dati a presidente Rodrigo Duterte, nga awan ti panagsisinnubang iti biang dagiti abogado iti defense team.
Daytoy ti kinuna ni Kaufman iti pananginterbiu kenkuana ti pro-Duterte blogger a ni Alvin & Tourism idi Agosto 1, kas sungbat iti inwaragawag ti common-law wife ni Duterte a ni Honeylet Avanceña, a saan a personal a makilanglangen ni Kaufman iti dati a presidente.
Segun ken ni Kaufman, pulos nga awan ti di panagtutunos dagiti tattao a mangimatmaton iti depensa ni Duterte, ket kinunana a siwawaya ni Bise Presidente Sara Duterte a mangikeddeng iti kalidad ti pannakilangen ken panagtrabahona a maipaay iti dati a presidente.
Nagkedked ni Kaufman a mangpatalged no pudno wenno saan ti report a saan a mapalubosan ni Avanceña a sumarungkar ken ni Duterte iti Scheveningen Prison iti The Hague, Netherlands.
Retirado a heneral, nakemmeg gapu iti panangsugsog a mangtippuog iti gobierno
Kinuna ni Kaufman a kasla “emotionally distressed” ni Avanceña ken mangaramid iti amin a kita ti panagatap a parparubroban dagiti dadduma a tattao.
"Ti pakalidayak laeng, kapilitan a busbosek ti panawenko a mangtaming kadagiti kakastoy a kita ti intriga," impudno ni Kaufman.
Naipaskil iti nadumaduma a social media ti sinao ni dati a panakangiwat ti presidente a ni Harry Roque, a maparitan ni Avanceña a mangsarungkar iti dati a presidente iti detention facility ti International Criminal Court, ta nakanselar ti panangsarungkar ni Avanceña idi napan a lawas a dida ammo ti gapuna. (Raymund Antonio/Manila Bulletin//Lito Hilidon/Bannawag)
