Imbilin ni Presidente Ferdinand Marcos Jr. ti agtultuloy a pannakaipaay ti serbisio ti gobierno iti probinsia ti Sulu, kalpasan a pinirmaanna ti pannakayallatiw daytoy manipud iti Bangsamoro Autonomous Region in Muslim Mindanao (BARMM) a naipan iti Region IX, wenno iti Zamboanga Peninsula, kas impaulog ti Korte Suprema.
Pinirmaan ni Presidente Marcos ti Executive Order (EO) No. 91, idi Hulio 31, a mangipatungpal iti pangngeddeng ti Korte Suprema a nangpasingked iti resulta ti plebisito idi 2001, nga idiay a nagbotos ti Sulu a maikontra iti BARMM (dati nga Autonomous Region in Muslim Mindanao wenno ARMM).
Maipakat ti EO iti probinsia ti Sulu ken dagiti kamengna a local government unit (LGU), departamento, ahensia, ken kamkameng ti ehekutibo ken ti dadduma pay a kapadada iti probinsia.
Segun iti pammilin ni Marcos, kasapulan daytoy a pannakayurnos tapno agtultuloy ti serbisio publiko iti Sulu ken mangraem iti pagayatan dagiti umili.
Senado, pinasingkedanna ti ₱6.793-trilion a nailian a badiet para 2026
Kabayatanna, dagiti turay ti Bangsamoro ken probinsia ti Sulu ket mabalin a mangbukel iti umno a tulag wenno mekanismo tapno agtultuloy a maponduan ken maipatungpal dagiti programa, aktibidad, ken proyekto ken masigurado ti naanayas a pannakaipaay ti serbisio ti gobierno kadagiti iturayanda. (Argyll Cyrus Geducos/Manila Bulletin//Lito Hilidon/Bannawag)
