Napaaktibo dagiti Enhanced Defense Cooperation Agreement (EDCA) site tapno agpaayda a kas pagummongan iti pannakaipatulod dagiti relief goods ken rescue equipment para kadagiti naapektaran dagiti kallabes a layus ken bagyo.
Daytoy ti impalgak ni Embahador ti Estados Unidos (US) MaryKay Carlson idi Agosto 2.
Inyebkas da Carlson ken Sekretario ti Department of National Defense (DND) Gilberto Teodoro Jr. ti panagyamanda kadagiti Filipino ken Amerikano a paset ti frontline service ken dagiti lokal nga opisial a timmulong iti pannakaipatulod dagiti ayuda kadagiti lugar nga inapektaran ti bagyo ken layus.
Itay Sabado, Agosto 2, nangitulod ti Office of Civil Defense (OCD) iti 2,500 a tolda iti Ilocos Norte manipud iti Fort Magsaysay, a maysa nga EDCA Site iti Nueva Ecija.
Senado, pinasingkedanna ti ₱6.793-trilion a nailian a badiet para 2026
Agarup 47,000 a family food packs manipud iti Department of Social Welfare and Development (DSWD) ti naited kadagiti nasurok a 200,000 a tattao iti Central ken Northern Luzon.
Naaramid daytoy babaen ti panagtitinnulong ti OCD, DSWD, ti Armed Forces of the Philippines, ti World Food Programme, ken ti militar ti US.
Pagsusupiatan ti politikal ken civil-society group ti kaadda ti EDCA site gapu iti pakaseknan iti soberania ken peggad iti seguridad.
Nupay iparit ti Konstitusion ti kaadda ti permanente a base-militar ti US iti Filipinas, palubosan ti EDCA site ti kaadda dagiti puersa ti Amerikano nga agrikrikus ken mangipaspasdek iti alikamen kadagiti base ti militar iti Filipinas. (Raymund Antonio/Manila Bulletin//Lito Hilidon/Bannawag)
