Kinompirmar ti Manila Department of Social Welfare (MDSW) a mapanen nga innem ti bilang dagiti nadangran iti bimtak a compressor iti nagsulian ti Dagupan ken Tayuman Street iti Tondo, Manila idi malem ti Domingo, Agosto 3.
Nairaman kadagiti nadangran ti maysa a menor de edad ken senior citizen nga adda iti lugar idi bimtak ti mapapati a nawarwar a compressor ti airconditioner.
Uppat kadakuada ti kritikal ti kasasaadda iti Tondo General Hospital ken Jose Reyes Memorial Medical Center; idinto a maysa ti naipadamag a naputdan iti ima.
Segun iti natakuatan dagiti kameng ti Explosives and Ordinance Division (EOD/K9) ti Manila Police District, mabalin a pinadas a warwaren ti grupo wenno ikkaten ti pressurized compressor, a dida ammo ti peggad a gubuayen daytoy. Kastoy latta ti konklusionda a makagapu iti panagbettak.
Senado, pinasingkedanna ti ₱6.793-trilion a nailian a badiet para 2026
Kinuna ni MDSW Director Jay Dela Fuente, maipapaayan iti medikal ken pinansial a tulong dagiti innem a biktima.
Agtultuloy latta dagiti opisial iti panagimbestigar iti pasamak, ket binallaaganda ti publiko nga agannadda no agiggem wenno agkolektarda kadagiti industrial scrap material, nangruna dagiti mabalin a naglaon pay laeng iti pressurized material. (Diann Calucin/Manila Bulletin//Lito Hilidon/Bannawag)
