Impalgak ti Malakanyang ita nga aldaw, Agosto 4, nga inrekomendar ti Department of Agriculture (DA) ti pannakaipangato ti taripa iti imported a bagas ken ti pannakaisardeng pay laeng ti importasion ti bagas.
Segun ken ni Sekretario ti Presidential Communications Office (PCO) Dave Gomez, daytoy ti insingasing ti DA tapno masalakniban dagiti Filipino a mannalon. Mapagpapatangan met daytoy a banag bayat ti kaadda ni Presidente Marcos iti India.
Nagluas ni Presidente Marcos iti India itay agsapa, ita a Lunes, Agosto 4, para iti maysa nga state visit, ket maysa ti agrikultura, ken kinatalged ti suplay ti taraon, kadagiti kangrunaan a sektor a maisapulanda iti mabalin nga agpuonan.
Insingasing daytoy ti DA kalpasan nga impalgakda a napintas ti apit nga irik ti pagilian iti daytoy a tawen.
Senado, pinasingkedanna ti ₱6.793-trilion a nailian a badiet para 2026
Maibatay iti datos ti Philippine Statistics Authority (PSA), mapanen a 9.08 a milion a metrika tonelada (MT), ti naapit nga irik manipud Enero agingga iti Hunio ita a tawen, ad-adu iti 6 a porsiento manipud iti 8.53 a MT iti isu met laeng a panawen idi napan a tawen.
Naringbawan daytoy ti nairekord a kaaduan nga apit ti irik a 9.026 a milion a MT idi 2023. (Betheena Unite/Manila Bulletin//Lito Hilidon/Bannawag)
