Rugian a pagsasaritaan ti Kamara ti 2026 National Expenditure Program (NEP) -- ti pagibatayan ti General Appropriations Bill (GAB) wenno singasing a nailian a badiet -- inton Septiembre 1.
Daytoy ti impalgak ni Nueva Ecija 1st district Rep. Mikaela Angela "Mika" Suansing, daulo ti House Committee on Appropriations, iti maysa a press conference idi Agosto 4.
Segun ken ni Suansing, inton Septiembre 1 a marugian ti Development Budget Coordination Committee (DBCC), ti umuna a grupo a mangtaming iti singasing a badiet.
Kinuna ni Suansing nga inton Agosto 13 ti manamnama a pannakaidatag ti NEP iti Kongreso, ngem adda pay sumagmamano a lasaten daytoy sakbay a pormal a maipila ti GAB. Agbatay ti GAB iti NEP nga aggapu iti Malakanyang.
Senado, pinasingkedanna ti ₱6.793-trilion a nailian a badiet para 2026
Ti karikutan a paset ti panangbukel ti badiet iti Kamara ket isu ti agsasaruno a panangtaming iti singasing a badiet ti tunggal ahensia, ta mabalin nga agpaut iti 10 nga oras ti panangbistada iti badiet ti maysa nga ahensia sakbay a malpas.
Innayon ni Suansing a nupay adu dagiti rabii wenno lawas a saandan a maturog gapu iti panangtamingda iti badiet, impasiguradona a kabaelan ti Komite a leppasen ti GAB iti naituding nga aldaw a pannakaipila daytoy. (Ellson Quismorio/Manila Bulletin//Lito Hilidon/Bannawag)
