Dua a senador ti nangipila iti joint resolution iti Senado idi Lunes, Agosto 4, a nagkiddaw iti pannakawaswas wenno pannakaibabawi iti bileg ti presidente a mangipangato, mangipababa, mangrebisar, wenno mangbaliw iti agdama a taripa ti naangkat a bagas.
Da Senador Francis “Kiko” Pangilinan ken Risa Hontiveros ti nangidatag iti Joint Senate Resolution No. 2 a mangkidkiddaw iti Kamara ken Senado a waswasenda koma ti bileg ti presidente a mangkontrol iti taripa iti bagas gapu iti makadadael nga epekto daytoy kadagiti mannalon.
Segun iti resolusion, ti nakaro a panangkissay iti taripa ti imported a bagas idi Hunio 2024 ti "nangpastrek iti adu a ganggannaet a bagas iti merkado ti Filipinas," a nangdadael iti morale dagiti mannalon ken iti pagsapulanda.
Kiddawen ti joint resolution ti pannakaisubli ti taripa iti imported a bagas iti dati a 35 a porsiento--manipud iti 15 a porsiento nga impaulog ti Executive Order (EO) No. 62 a pinirmaan ti Executive Department idi Hunio 2024-- apaman a maanamongan ti joint resolution.
DOH, namakdaar iti posible a pannakadangran iti Traslacion
Nupay bigbigen ti joint resolution a ti Section 1608 ti Republic Act No. 10863 wenno ti Customs Modernization and Tariff Act (CMTA) of 2016, ti nangipaay iti karbengan iti presidente a mangkontrol iti taripa, kinuna dagiti senador a saan nga absoluto daytoy a bileg, ta mabalin nga ibabawi wenno waswasen ti Kongreso daytoy.
Kinuna ni Pangilinan, daulo ti Senate Committee on Agriculture, Food, and Agrarian Reform, a saan koma nga in-inut a papatayen dagiit mannalon, no di ket isakit ti kalinteganda a makaganansiar a nasayaat, ket agbiag a nadayaw.
Dinagadag ti joint resolution dagiti maseknan a komite ti Senado ken Kamara a repasuenda koma ti agdama a kasasaad ti industria ti bagas ken ti pagimbagan dagiti lokal a mannalon. (Hannah L. Torregoza/Manila Bulletin//Lito Hilidon/Bannawag)
