"Saantayon nga agkaaliado."
Daytoy ti impakdaar ni Presidente Ferdinand Marcos Jr. a mangwaswas iti singgalut kadagiti kaaliadona no matakuatanna a mairamanda iti nasaknap a panagkunniber kadagiti flood control project iti pagilian.
Pammasingked daytoy ni Presidente Marcos iti sinaona iti maikapat nga State of the Nation Address (SONA) maipapan iti ar-aramiden dagiti opisial ken contractor a panguartaanda dagiti flood control project.
Makalawas kalpasan ti panangideklarar ni Marcos a maibestigaran amin a flood control projects iti pagilian, saanna pay a ninaganan dagiti opisial a nairaman iti anomalia iti proyekto, ngem kinunana a nabigbigdan dagiti dadduma ket ibutaktakdanto dagiti nagan dagiti opisial.
44% kadagiti Filipino, mangnamnama iti nasaysayaat a kalidad ti panagbiag iti 2026 —SWS
Kinuna ni Marcos a third party investigator, saan a ti Department of Public Works and Highways (DPWH) nga ahensia a nangyimplementar kadagiti proyekto, ti mangimbestigar kadagiti proyekto a naponduan ngem saan a pulos naipatakder.
Segun ken ni Marcos, iggemdan dagiti nagnagan dagiti contractor ken opisial a nairaman kadagiti ghost project ken naanomalia a proyekto, ket maidarum dagitoy no saanda a mailawlawag no napanan ti pondo. (Betheena Unite/Manila Bulletin//Lito Hilidon/Bannawag)
