Kayat a paimbestigar ni Senador Erwin Tulfo dagiti di autorisado a pasdek a makabangen kadagiti pagayusan ti danum a mangparparnuay iti mauli-ulit ken nakaro a layus iti pagilian.
Dinagadag ni Tulfo dagiti maseknan nga ahensia ti gobierno a mangtedda iti report kadagiti di autorisado a pasdek a mangbangen iti pagnaan ti danum ken dagiti natural a drainage system ti entero a pagilian.
Inriing daytoy ni Tulfo kalpasan ti isasarungkarna iti Puerto Princesa City, Palawan nga inapektaran unay dagiti nabiit pay a bagyo ken abagat, a makagapu iti panaglayus iti adu nga ili ken panagbakuit ti nasurok a 6,000 a tao.
Segun ken ni Tulfo, adu ti naawatna a report ken nasaksianna a mismo no kasano a nayallatiw ken nagaburan dagiti karayan, waig, ken kanal, gapu iti pannakaipatakder iti kalsada ken para iti negosio a pasdek.
44% kadagiti Filipino, mangnamnama iti nasaysayaat a kalidad ti panagbiag iti 2026 —SWS
Kinuna ni Tulfo nga iti laksid ti pannakaiparit, agtultuloy latta dagiti pananglabsing, ken mapalpalubosan latta dagiti illegal a pasdek kadagitoy a pagnaan ti danum. (Dhel Nazario/Manila Bulletin//Lito Hilidon/Bannawag)
