Innem a tawenen nga ipatpatungpal ti Mariano Marcos Memorial Hospital and Medical Center (MMMHMC) iti Siudad ti Batac, Ilocos Norte ti zero-balance billing program para kadagiti napili a pasiente.
"Agarup innem a tawenen ti napalabas, naibilin amin nga ospital ti DOH (Department of Health) nga ipatungpalda dayta, ngem narigat a tungpalen dagiti dadduma nga ospital," kinuna ni Dr. Maria Lourdes Otayza, hepe ti medical center ti MMMHMC, iti bitlana bayat ti selebrasion ti National Hospital Week idi Lunes, Agosto 4.
"Ti napateg, inrugimi a yimplementar apaman a naibilin a mayimentar," innayonna.
Segun ken ni Otayza, mayaplikar ti nasao a programa kadagiti pasiente a naka-confine iti ward wenno iti basic accommodations.
Farm specialist iti Abra, napaltogan
Iti panaglabas dagiti tawen, kinuna ni Otayza a nabenepisiaran ti programa saan laeng a dagiti nakurapay (indigent) a pasiente no di pay ket kadagiti pasiente nga addaan kanser ken dagiti agday-dialysis.
"Isu a ditoy ti pappapananda para iti cancer treatment ken dialysis gapu ta ammo dagiti pasiente nga ipapaymi dayta a libre," kinunana.
Kinunana pay nga iti pannakaipatungpal ti Universal Health Care program, ilawlawa ti MMMHMC ti serbisiona kadagiti dadduma a lugar iti probinsia babaen ti pannakaipasdek dagiti urgent care center.
Innayonna a daytoy ket tapno maliklikan met ti panaglilinnetlet dagiti pasiente iti MMMHMC.
Para iti breast cancer patient a ni Mylene Aguilar ti Barangay 3, Siudad ti Laoag, ti zero-balance billing program ket maysa a mapangnamnamaan a serbisio.
Nadayagnos nga addaan iti kanser idi 2023, kinuna ni Aguilar nga agyamyaman iti MMMHMC gapu iti cancer benefit package ti ospital a mangsakup kadagiti outpatient ken inpatient services, a pakairamanan, ngem saan a limitado, iti diagnostics, therapeutic procedures, medisina, treatment and management services, ken dadduma pay a care-related components ti kanser.
Tapno magun-odl ti cancer benefit package, kinuna ni Aguilar a masapul nga agparehistro ti pasiente iti babaen ti Cancer Assistance Fund ti DOH.
"Libre amin ti treatment ken agas malaksid no awan ti agas iti botika ti ospital," kinunana.
Maysa ti MMMHMC iti Batac kadagiti 31 a cancer treatment site ti DOH a naituding a mangisayangkat iti libre nga screening ken konsultasion tapno maitandudo ti nasapa a pannakaduktal ti kanser ken mapasayaat ti resulta ti panangagas. (Leilanie Adriano/PNA)
