Dimmatag ti grupo ti oposision nga 1Sambayan iti Korte Suprema (SC) tapno kiddawenda a baliwan koma ti SC ti pangngeddengna a nangipasardeng iti impeachment trial ni Bise Presidente Sara Duterte, ket impettengda a naanamongan ti impeachment complaint iti plenario ti Kamara sakbay a mayallatiw iti Senado.
Iti omnibus motion for reconsideration a naipila idi Martes, Agosto 5, kiniddaw ti 1Sambayan--a buklen dagiti retirado a mahistrado (justice) ti SC a da Antonio T. Carpio ken Conchita Carpio Morales, dagiti abogado, dagiti dati nga opisial ti gobierno ken daulo ti civil society-- a repasuen, rebisaren, baliwan ken/wenno waswasen koma ti SC ti pangngeddeng nga impaulogda idi Hulio 25.
Kiniddaw pay ti grupo a mangipaulog koma iti quo ante order ken mangangay iti oral arguments ti SC.
Idi Hulio 25, indeklarar ti SC a linabsing ti Kamara ti paglintegan iti one-year bar segun iti Article XI, Section 3(5) ti Constitution, ket ngarud, "null and void ab initio" ti Articles of Impeachment, ken awan hurisdiksion ti Senado a mabukel kas maysa nga impeachment court.
Retirado a heneral, nakemmeg gapu iti panangsugsog a mangtippuog iti gobierno
Segun iti SC, "effectively dismissed" dagiti tallo nga impeachment complaint a naipila kontra ken ni Duterte idi arinunos ti 2024, ket ti maikapat nga impeachment complaint a naipila ken nayawat idi Pebrero 5 ket naiduma ken sabali a wagas ti proseso ti impeachment.
Ngem sinupiat daytoy ti 1Sambayan ket kinunada a nagbiddut ti SC iti konklusionna a saan a naaprobaran iti plenario ti maikapat nga impeachment complaint.
Dinakamat ti 1Sambayan ti opisial a rekord ti plenary session ti Kamara idi Pebrero 5 a nangiparang nga inanamongan ti nasurok a kakatlo (1/3) ti amin a kameng ti Kamara ti maikapat nga impeachment complaint.
Kinuna ti 1Sambayan a ti plenary vote ket maysa nga opisial a tignay ti lehislatura, kas sagudayen ti Section 1, Rule 129 ti Rules of Court.
Kinuna pay ti 1Sambayan a di maikanatad iti linteg ken polisia ti panagpannuray ti SC iti report ti media, a dinakamatda ti kaso ti Roque v. Commission on Elections idi 2010, nga inkeddeng ti SC: "Saan a namnamaen dagiti petitioner nga agtignay ti Korte kadagiti di napatalgedan a report a naited iti daytoy."
Kinarit ti 1Sambayan ti baro a requirement iti proseso ti impeachment nga impaulog ti SC iti kaso ni Duterte.
Nupay bigbigenda ti karbengan ti SC a mangwaswas iti aramid ti lehislatura ken ehekutibo a manglabsing iti Konstitusion, kinuna ti 1Sambayan a naglablabes ti SC iti panangideklararda nga adda karbenganda a mangarisit iti proseso nga imandar ti Konstitusion idinto a dida met inlawlawag a maaramid laeng daytoy no adda grave abuse of discretion iti biang ti Kongreso.
Kinuna ti 1Sambayan nga imposible a matungpal ti Kamara ti baro a proseso ti impeachment ta saan pay nga impaulog ti SC daytoy idi insayangkat ti Kamara ti impeachment complaint kontra ken ni Duterte, ket di rumbeng a dusaen ti SC ti Kamara gapu iti dina pannakatungpal iti linteg nga awan pay met idi.
Innayon ti grupo a nayawat ken inawaten ti Senado ti maikapat nga impeachment complaint, a nagbalinen a kas maysa nga impeachemnt court ken nangipatulod payen iti summons ken ni Duterte sakbay nga impasardeng ti SC ti panagtulid ti impeachment trial. (Bananwag NewsTeam)
