Binilin ti Korte Suprema (SC) ni Bise Presidente Sara Duterte, ken dagiti dadduma pay a nagpetision, a mangted iti komentoda mainaig iti mosion nga impila ti Kamara a mangpawaswas iti pangngeddeng a nangideklarar nga "unconstitutional" ti articles of impeachment a maibusor kenkuana.
Iti resolusion nga impaulog ti SC idi Agosto 5, binilin ti SC dagiti nagpetision nga indauluan ni Esraelito Torreon a mangidatagda iti komentoda iti las-ud ti 10 nga aldaw kalpasan a maawatda ti dokumento.
Iti nagkaykaysa a desision dagiti mahistrado ti SC, indeklararda nga "unconstitutional" ti impeachment complaint nga impila ti Kamara idi Pebrero 5, 2025 gapu iti pananglabsingda iti one-year bar rule a sagudayen ti Article XI, Section 3(5) iti 1987 Constitution, kasta met ti kalintegan iti due process a nailanad iti Bill of Rights.
Ngem inlawlawag ti SC iti desisionda a saanda nga inabsuelto ni Bise Presidente Duterte kadagiti pammabasol a nailanad iti impeachment complaint.
Senado, pinasingkedanna ti ₱6.793-trilion a nailian a badiet para 2026
Iti mosion nga impila ti Kamara idi Agosto 4, inggunamgunamda a ti inaramidda iti impeachment complaint ti bise presidente ket maitunos iti sagudayen ti Konstitusion ken jurisprudence. (Rey G. Panaligan/Manila Bulletin//Lito Hilidon/Bannawag)
