Nakasagana ti Office of the Vice President (OVP) a mangituloy kadagiti programana uray kissayan ti Kongreso ti singasingda a badiet a ₱903 a milion para iti 2026, kinuna ti panakangiwat ti OVP a ni Ruth Castelo, ita nga aldaw, Agosto 6.
Segun ken ni Castelo, raemenda ti ania man a pangngeddeng dagiti mammanday linteg a mangipaay iti pondo kas idi napalabas a tawen a ₱733 a milion.
Kinuna ni Castelo a nailatangen ti ₱903 a milion a singasing a badiet kadagiti nadumaduma a programa ti OVP, kas iti panangipaay iti tulong kadagiti naapektaran ti didigra.
Iti sabali a bangir, naragsakan ni Castelo iti kinuna ni Senador Sherwin Gatchalian, daulo ti Senate finance committee, nga aprobaran ti Senado ti ₱903 a milion a singasing a pondo ti OVP no la ketdi awan ti naikabil a confidential fund iti dayta.
Senado, pinasingkedanna ti ₱6.793-trilion a nailian a badiet para 2026
Itay kallabes, kinuna ni Bise Presidente Sara Duterte a saanen nga agkiddaw ti confidential wenno intelligence fund ti OVP kadagiti mapasungad a badietda gapu iti napataud a kontrobersia idi napan a tawen. (Argyll Cyrus Geducos/Manila Bulletin/Lito Hilidon/Bannawag)
