Opisial a nabukel manen ken agsublli iti Kamara dagiti Mangibagi ti quad-committee (quad-comm) iti agdama a maika-20 a Kongreso, kalpasan nga inadaptar dagiti kongresista bayat ti plenary session-da idi rabii ti Martes, Agosto 5, ti House Resolution (HR) No.106, a mangipalubos kadagiti uppat a komite (Committees on Human Rights, Public Order and Safety, Dangerous Drugs, and Public Accounts) a mangisayangkat iti joint inquiry, kas tulong iti lehislasion. tapno mataming dagiti rummuar ken dagiti saan pay a nasolbar nga isyu iti joint investigation ti napalabas a quad-comm ti napalabas a maika-19 a Kongreso.
Ginubuay ti resolusion ti pormal a pannakairuar ti makunkuna a "quad-comm version 2.0", nga idauluan dagiti sumaganad a co-chairmen: Manila 6th district Rep. Bienvenido Abante Jr., a chairman ti Committee on Human Rights; Manila 2nd district Rep. Rolando Valeriano, chairman ti Committee on Public Order and Safety; Bukidnon 2nd district Rep. Jonathan Keith Flores, chairman ti Committee on Dangerous Drugs; ken Bicol Saro Party-list Rep. Terry Ridon, chairman ti Committee on Public Accounts.
Ingganetget ni Abante, ti overall chairman ti baro a quad-comm, ti pannakaipila ti HR no.106 iti privilege speech-na idi Lunes, Agosto 4.
Bigbigen ti resolusion ti madagdagus a kasapulan a sublian manen dagiti kritikal a kaso ken tamingen dagiti sistematiko a parikut a saan pay a nasolusionan--nangruna dagiti mainaig kadagiti alegasion ti extrajudicial killings (EJK), panangabuso iti turay, maiparit nga aktibidad a nainaig iti Philippine Offshore Gaming Operators (POGO), ken dagiti giwang iti accountability kadagiti pannakabagi ti linteg ken dagiti ahensia ti publiko.
Senado, pinasingkedanna ti ₱6.793-trilion a nailian a badiet para 2026
Immuna a nabukel idi Agosto 2024 bayat ti maika-19 a Kongreso, nangangay ti quad-comm iti 15 a marathon hearing kadagiti nadakamat a mapapati nga agkakanaig nga isyu. Ti highest profile witness wenno resource person a timmabuno iti serye ti marathon hearing nga inangay ti joint panel ket ni dati a presidente Rodrigo Duterte a mismo. (Ellson Quismorio/MANILA BULLETIN)
