Idinto nga impinget ni Senador Rodante Marcoleta a masapul a waswasenen ti Senado ti impeachment complaint kontra ken ni Bise Presidente Sara Duterte, ingganetget met ni Senate Minority Leader Senador Vicente “Tito” Sotto III a nupay madagdagus a nasken a maipakat, saan pay a pinal ti desision ti Korte Suprema a mangideklarar a kas unconstitutional ti impeachment complaint.
Daytoy ti rason ni Sotto idi sinungbatanna ni Marcoleta kalpasan a nagmosion daytoy tapno a ma-dismiss ti impeachment complaint, iti panangtaming ti Senado iti kaso ita nga aldaw, Agosto 6.
Segun ken ni Sotto, patienna nga awan ti rason a masapul a dardarasen ti Senado ti pannakawaswas ti kaso nangruna ta naipila metten ti Kamara ti motion for reconsideration-da iti SC idi Lunes, Agosto 4.
“Daytoy a desision ti Korte Suprema, nupay madagdagus a maipakat, saan pay a pinal, ngarud mabalin a maapelar. Ita, ta nayapelaren, apay nga agdardarastayo a mangwasweas itoy?” kinuna ni Sotto iti interpellation-na.
Senado, pinasingkedanna ti ₱6.793-trilion a nailian a badiet para 2026
Impalagip ni Sotto a posible ti pannakabaliktad ti bukod a pangngeddeng ti SC—uray kadagiti makuna a landmark a kaso.
Sinupiatna pay ti interpretasion ti SC iti adjournment, a linawlawaganna a “saan a Pebrero 5 a nagpatingga ti maika-19 a Kongreso kas naibaga iti desision. Ti sine die adjournment ti maika-19 a Kongreso ket idi Hunio 14, 2025, ket ti maudi nga aldaw ti sesion ket idi Hunio 11.”
“Dakkel ti nagdumaan ti adjournment iti sine die adjournment. Daytoy ket transcendental case, nagdakkel a constitutional issue daytoy. Awan man laeng ti oral arguments wenno uray la koma konsultasion iti maysa a tao manipud iti Kongreso maipapan iti procedure,” kinunana.
Kinuna pay ni Sotto nga imposible a kunaen a saan a nakagun-od ti Senado iti hurisdiksion iti kaso ti impeachment ti bise presidente.
“Ania ngay ti pangawagyo iti pannakabukel (ti Senado) a kas impeachment court? Nagaruatda pay iti roba ken nangipatulodda pay iti summons. Ania daydiay, moro-moro laeng?" kinunana.
“Ikkantayo iti gundaway iti SC a mangilinteg iti desisionna, a naglaon kadagiti nalawag ken agdadata a biddut, para iti pagimbaganda ken para iti masanguanan nga impeachment proceedings,” insingasing ni Sotto.
“Let us not dismiss forthwith! (Saantayo a waswasen a dagus!)” kinunana. (Dhel Nazario, Hannah L. Torregoza/MANILA BULLETIN)
