Saan a makalisi ti Filipinas iti posible a gubat iti Taiwan (no rauten ti China) gapu iti kaasideg daytoy iti pagilian ken kaadu ti Filipino nga agtrabtrabaho sadiay.
Daytoy ti kinuna ni Presidente Ferdinand Marcos Jr. iti maysa nga innuman iti website ti India a Firstpost, iti baet ti kumarkaro a riribuk iti Taiwan Strait a mabalin a mangapektar kadagiti kabangibang a pagilian, agraman ti Filipinas.
Segun ken ni Marcos, no rumsua ti gubat iti nagbaetan ti Estados Unidos ken China iti Taiwan (gapu iti mabalin a panangraut ti China iti Taiwan tapno sakupenna), imposible a di mairaman ti Filipinas iti dayta, gapu ta agassideg unay dagiti dua a pagilian, ket nasken a depensaan ti Filipinas ti teritoriona.
Ngem inlawlawag ti presidente a ti panangtulong kadagiti Filipino iti Taiwan, a saan a mainaig iti militar, ti kangrunaan a pakaseknan ti gobierno ti Filipinas.
Senado, pinasingkedanna ti ₱6.793-trilion a nailian a badiet para 2026
Kumarkaro ti risiris iti Taiwan gapu ta mabalin a sakupen ti China ti Taiwan iti daytoy a dekada, ket segun kadagiti analyst, mabalin a mangpataud daytoy iti nasaksaknap a gubat iti rehion. (Argyll Cyrus Geducos/Manila Bulletin//Lito Hilidon/Bannawag)
