Agtalinaed iti sidong ti National Bureau of Investigation (NBI) ti maysa a mayor ti ili iti Pampanga agraman ti dua a kakaduana kalpasan ti pannakaarestarda gapu iti maipagarup a panagkikil (extortion).
Segun ken ni NBI Director Jaime B. Santiago, naipupok da Abundio Punsalan Jr., mayor ti San Simon, ti di nainaganan a security aide-na, ken ni Dr. Ed Ryan Dimla, iti pasilidad ti NBI iti New Bilibid Prison (NBP) iti Muntinlupa City.
Kinemmeg ti NBI da Punsalan ken dagiti kakaduana idi Agosto 6 gapu iti panangawatda iti ₱30 a milion a pasuksok iti uneg ti maysa a restauran iti Clark Freeport Zone iti Pampanga.
Insayangkat ti NBI ti operasion gapu iti reklamo ti Real Steel Corporation a maipagarup a panagdawat ni Punsalan iti agdagup iti ₱80 a milion a kasukat ti pabor kadakuada a resolusion ti gobierno lokal. (Jeffrey Damicog/Manila Bulletin//Lito Hilidon/Bannawag)
