Naiserra pay laeng ti maysa a simbaan a Katoliko iti Jimenez, Misamis Occidental kalpasan a mapapati a tinupraan ti maysa a babai a vlogger iti holy water font wenno pagbenditaan ti simbaan itay nabiit, maysa nga insidente a nai-video ket nagbalin a viral wenno nagwaras iti online.
Binabalaw ni Ozamiz Archbishop Martin Jumoad ti pasamak, a dineskribirna a “grave act of sacrilege” a maibusor iti sagrado a banag a nairanta para iti pannakasantipikar dagiti mamati wenno deboto.
Kinuna ni Jumoad a ti pannakaiserra ket maitunos iti linteg ti Simbaan a Katoliko ken maysa met daytoy a liturgical ken pastoral response a nairanta a manggubuay iti panagbabawi ken communal reparation.
Kinunana nga agtalinaed a siseserra ti simbaan ti parokia ni Saint John the Baptist agingga a di pay maipakaamo a maluktan manen, kas pagilasinan ti panagpenitensia ken reparasion.
Senado, pinasingkedanna ti ₱6.793-trilion a nailian a badiet para 2026
“Daytoy ket tapno maipakat ti kombersion ti puso ken communal purification kas iwanwanwan ti sursuro dagiti Katoliko,” kinuna ni Jumoad, a nangibilin a maangay ti Nasantuan nga Oras ti Panagdaydayaw ken maysa a serbisio para iti napasnek a panagkompesar iti alas 3 iti malem ita a Huebes, Agosto 7, tapno tumulong iti spiritual healing ti komunidad.
Awan ti naikeddeng a petsa ti panaglukat manen ti simbaan.
Kinuna ni Jumoad a ti panaglukat manen ti simbaan ket agpannuray iti pannakipaset dagiti mamati kadagiti aramid ti penitensia ken pastoral assessment ti naespirituan a disposision ti parokia.
Pinakdaaranna ti vlogger, a nagsangsangit met a nagdawdawat iti pammakawan. "Daytoy ket nadagsen a basol ken desecration nga addaan kadagiti eklesiastikal a pannusa ken mamagpeggad iti pannakilangen ti tao iti Dios ken iti Simbaan," kinuna ni Jumaod.
Binalakadanna ti babai a vlogger nga agbabawi. “Masapul ti madagdagus a panagkompesar ken napasnek a panagbabawi tapno maisubli ti takder ti maysa a tao iti komunidad ti pammati."
Kiniddaw ni Jumoad ti napabaro a panagraem ken naespirituan a panagkumit kadagiti mamamati. “Dagiti sagrado a bambanag ken lugar ket pagkargaan iti parabur ti Dios ket maikari iti naan-anay a panangrespetar ken panagdaydayawtayo,” innayonna. (Tristan Lozano/MANILA BULLETIN)
