Masapul a naan-anay a matengngel ti Israel ti Gaza Strip tapno matungpal ti gandatda a mangpugipog iti grupo a Hamas ken inton agangay, mayawat kadagiti nasingpet a puersa ti Arabo.
Daytoy ti inwaragawag ni Prime Minister ti Israel Benjamin Netanyahu, bayat a pagsasaritaan ti Security Cabinet ti pannakailayon ti 22 a bulan nga opensibada.
Ti pannakaisaknap ti operasion ti militar iti Gaza ti mamagpeggad iti biag dagiti Palestino ken iti 20 a natda a hostage nga Israeli, idinto a kontroladon ti Israel ti dandani entero a lugar.
Amken dagiti pamilia ti hostage iti Gaza a mabalin nga agpeggad dagiti ay-ayatenda ken nagprotestar ti dadduma iti ruar ti Security Cabinet meeting a naangay iti Jerusalem.
Ayatollah ti Iran, binallaaganna ti US
Sinupiat dagiti dati a nangato nga opisial ti Israel ti gandat ni Netanyahu, ket nagballaagda iti riribuk a saan a pagnumaran ti militar.
"Awanen ti natda a sakupenda," kuna ni Maysaa al-Heila, a maysa kadagiti agindeg iti displacement camp. "Awanen ti natda a Gaza."
Saan a nababbaba iti 42 a Palestino ti nairaman a natay gapu kadagiti airstrike ken panangpaltog dagiti puersa ti Israel iti abagatan a paset ti Gaza itay Huebes, segun iti lokal nga ospital.
Iti maysa nga interbiu iti Fox News sakbay ti naangay a Security Cabinet meeting, kinuna ni Netanyahu a kayatda a tengngelen ti Gaza tapno masigurado ti kinatalgedda, mapukaw dagiti Hamas sadiay, ken maisalakan dagiti tao manipud iti Gaza. (Associated Press/Manila Bulletin//Lito Hilidon/Bannawag)
