Nagpatingga iti trahedia ti maysa a teenage romance idi pinaltogan ti 18-anios nga estudiante a lalaki ti 15-anios a dati a nobiana sa kalpasanna pinaltoganna met ti bukodna a bagi, iti uneg ti klasrum ti maysa a pagadalan iti Barangay Rizal, Santa Rosa, Nueva Ecija idi Agosto 7.
Kinompirmar met ti polisia a pimmusayen ti suspek a ni alias Leo idi 3:30 iti malem ti Biernes, Agosto 8, segun ken ni Police Capt. Noime Gogotano, pannakangiwat ti Nueva Ecija Provincial Police Office.
Kritikal pay laeng met ti kasasaad ti biktima a ni alias Lea, 15, a napaltogan ti tengngedna, ket mabambantayan daytoy iti ospital.
Napasamak ti insidente idi Huebes, Agosto 7, idi maipagarup a sinnerek ni Leo iti classroom da Lea ket iti sango dagiti nakigtot a kaklasean ti balasitang, nangiruar iti paltog ket pinaltoganna ti balasitang. Kalpasanna, pinaltoganna met ti bagina.
Farm specialist iti Abra, napaltogan
Agpada a naitaray dagiti dua iti kaasitgan nga ospital, ngem idi agangay, inyawid ti pamilia ni Leo ta segun iti report, napukawen ti namnamada a makalasat pay daytoy.
Segun kadagiti inbestigador, panagselos ti motibo ti pammaltog.
Sigud nga agkarelasion da Leo ken Lea, ngem ti kanayon nga agapa dagitoy isu nga inkeddeng dagiti autoridad ti eskuela a makibiang ket pinagsinada dagitoy.
Kalpasan ti panagsinada, naipadamag a pinadas ni Leo ti makisarita ken ni Lea, ngem nagkedked ti balasitang. ( Liezle Basa Iñigo/MANILA BULLETIN)
