"Awan ti kankanunongak a kas kadakuada."
Daytoy ti sungbat ni Senate Minority Leader Vicente “Tito” Sotto III iti panangbueltana iti panangbabalaw kenkuana ni Senate President Francis “Chiz” Escudero iti social media, ket inlawlawagna ti pagtaktakderanna maipapan iti Charter Change ken dinepensaanna ti bagina manipud kadagiti pammabasol a makikadkadua isuna iti Kamara.
'Agtalnaka laeng' kinuna ni Escudero iti paskilna iti X (dati a Twitter) ken ni Sotto, nga inakusaranna daytoy a makituntunos iti kaso ti impeachment nga indauluan ti Kamara kontra ken ni Bise Presidente Sara Duterte iti laksid ti pangngeddeng ti Korte Suprema a nangibilang nga unconstitutional ti nasao a kaso.
Iti paskil ni Escudero, kinunana a maipagarup a makikadkadua manen ni Sotto iti Kamara ken ni Speaker Martin Romualdez maipanggep iti Charter Change.
Senado, pinasingkedanna ti ₱6.793-trilion a nailian a badiet para 2026
“Easy lang po... kinampihan na nga po ninyo ang impeachment ng HOR at ni Speaker Martin maski sabi ng SC UNCONSTITUTIONAL... ngayon naman po kinakampihan na din nyo ang ChaCha ng HOR at ni Speaker Romualdez!?!?” impaskil ni Escudero, nga inadawna ti interbiu ni Sotto iti Philippine Star.
Nupay kasta, inlibak ni Sotto a makikadkadua iti Kamara. “Ti imbagak, no agtakder ti pangngeddeng ti SC ket maamendaran ti Konstitusion babaen laeng ti desision ti SC, ngarud ikonsiderarko ti panangsuportar iti maysa a Constitutional Convention tapno mabaliwan ti Article XI ti Constitution,” inlawlawag ni Sotto, nga ingganetgetna a dagiti requirement a naikeddeng iti desision ti SC ket “imposible a maragpat.”
“Awan kankanunongak a kas kadakuada. Ti Konstitusion ti kankanunongak," innayon ni Sotto.
Iti botosda 19-4-1, indulin wenno in-archive ti Senado ti articles of impeachment kontra ken ni Sara Duterte. (Dhel Nazario/MANILA BULLETIN)
