Naala ni Filipino boxing Hall of Famer Manny Pacquiao ti No.1 a puesto iti World Boxing Council (WBC) welterweight rankings kalpasan ti majority draw decision kontra iti agdama a kampeon a ni Mario Barrios idi napan a bulan.
Iti listaan nga inruar ti WBC idi Agosto 8, ngimmato iti uppat a tukad ni Pacquiao manipud iti napalabas a ranggona a No. 5 best fighter iti welterweight division a nangisaadan kenkuana ti WBC kalpasan nga inwaragawagna ti panagsublina a makilaban.
Idinto nga adu ti nagduadua iti kabaelanna nangruna ket 46 ti tawennan ken uppat a tawen a di nakilablaban, nakaparagsak ti labanna ken ni Barrios a kuna ti adu a fans ken enthusiasts a mamatida a ni Pacquiao koma ti rumbeng a nangabak iti laban.
Dayta met ti nangipalubos ken ni Pacquiao, 62-8-3 (39 KOs) a mangpadisi iti dati a No. 1 a ni Souleymane Cissokho, 18-0 (9 KOs), a nangparmek ken ni Egidijus Kavaliauskas babaen ti unanimous decision idi Mayo.
Retirado a heneral, nakemmeg gapu iti panangsugsog a mangtippuog iti gobierno
Iti ilalagtona No. 1 a puesto, posible itan ti rematch-da ken Barrios nupay naibagan ti kampo ni Pacquiao a nagustuanda ti matchup kontra ken ni Rolly Romero, ni Gervonta Davis, wenno ni Ryan Garcia. (Reynald I. Magallon/MANILA BULLETIN)
