Naduktalan ni Presidente Ferdinand Marcos Jr. dagiti "makariribuk" nga estadistika iti isuamin a proyekto ti panangkontrol iti layus iti pagilian, a pakairamanan ti pannakaiwaras ti 20 a porsiento kadagiti proyekto iti entero a pagilian iti 15 laeng a kontraktor.
Nangisayangkat ni Marcos iti press conference iti Malakanyang ita a Lunes, Agosto 11, tapno maipalgak ti sumagmamano a kangrunaan a punto ti agtultuloy nga imbestigasion kadagiti flood control project, ken tapno maipakaammo ti pannakairuar ti maysa a website a nairanta para iti pannakasukimat ken panangamiris, a pakairamanan ti mekanismo ti panangireport dagiti umili.
Iti panangipalgakna kadagiti immuna a natakuatanda, kinuna ti presidente a nasayaat no kitaen a mismo dagiti tattao dagitoy tapno agbalin a tarabay tapno maammuan no sadino ti nangrugian ti problema.
Imbatad ni Marcos a duapulo a porsiento iti entero a ₱545-bilion a flood control projects ti naited iti 15 laeng a kontraktor, a lima kadagitoy ti addaan kontrata iti sibubukel a Filipinas.
Tignay ti Kamara iti kaso nga impeachment kontra ken ni VP Sara, maammuan ita nga aldaw
Manipud Hulio 2022 agingga iti agdama, ₱545.64 a bilion ti dagup a gastos ti amin a proyekto.
Impalgak ni Marcos a 6,021 a proyekto nga aggatad iti nasurok a ₱350 billion ti saan a naibaga no ania ti eksakto a klase ti flood control a maibangbangon, natarimaan, wenno na-rehabilitate.
Impalgak pay ni Marcos a naammuanda a sumagmamano a proyekto iti nagduduma a lokasion ti addaan eksakto nga agpapada a contract cost, a mabalin a kaipapananna nga agpapada ti disenio, materiales, ken kaatiddog ti nausar iti laksid ti nagdudumaan dagiti lokasion ken terrains.
"Pagarupek a siasino man nga agtrabtrabaho iti man pribado a sektor wenno iti sektor publiko, no kunam nga adda 50 a proyekto ket sag-150 milion amin. Agpapareho amin. Imposible daytan," impaganetget ti presidente.
"Imposible para iti maysa a barangay, uray isuda ti sumaruno a barangay, nga addaan iti eksakto a kapada a proyekto iti eksakto a kapadana a kantidad iti eksakto a kapadana a kontraktor," innayonna.
Maysa pay a makariribuk nga impormasion a natakuatanda iti damo nga imbestigasion ket ti di panagtutunos dagiti lokasion nga addaan iti kaaduan a proyekto ken dagiti kangrunaan a probinsia a nalaka a malayus.
Dagiti 10 a probinsia nga addaan iti kaaduan a proyekto: Bulacan (668), Cebu (414), Isabela (341), Pangasinan (313), Pampanga (292), Albay (273), Leyte (262), Tarlac (258), Camarines Sur (252), ken Ilocos Norte (224).
Idinto a dagiti kangrunaan a 10 a probinsia a nalaka a malayus ket pakairamanan ti Pampanga, Nueva Ecija, Pangasinan, Tarlac, Bulacan, Metro Manila, Maguindanao, North Cotabato, Oriental Mindoro, ken Ilocos Norte.
Iti sabali a bangir, dagiti rehion nga addaan iti kaaduan a proyekto ken kangatuan a gastos ket ti National Capital Region nga addaan iti 1,058 a proyekto, a nakagastos iti ₱52.57 a bilion; Central Luzon nga addaan iti 1,617 a proyekto, a nakagastos iti ₱98.01 a bilion; ken Bicol Region nga addaan iti 866 a proyekto, a nakagastos iti ₱49.61 bilion.
Bayat ti panangipalgak ni Marcos iti sumagmamano nga immuna a natakuatan iti imbestigasion iti flood-control, inruarna met ti website a pakakitaan iti listaan dagiti amin a flood-control projects iti pagilian, a ditoy ket mabalin a direkta nga i-report ti publiko ti ania man nga anomalia wenno di panagtutunos nga ammoda maipapan iti maysa a proyekto.
"Naawatmi ti listaan manipud iti DPWH (Department of Public Works and Highways). Dakami, iti panagkunak, inkabilmi daytoy iti wagas a silulukat iti publiko. Ket kangrunaanna, iti wagas a mabalin nga usaren ti publiko tapno umuna, mailasin dagiti proyekto—dagiti proyekto a pangkontrol iti layus nga adda iti lugarda, iti barangayda tapno aktual a makapanda ket kitaenda dagitoy," kinuna ni Marcos.
"Wenno no addan impormasionda, mabalinda nga ibaga kadakami," innayonna.
Impagantget ni Marcos iti publiko nga usarenda ti website ken tulonganda ti gobierno a mangilasin kadagiti ad-adu pay a problemado a proyekto, nga impaganetgetna a ti naan-anay nga imbestigasion kadagiti naanomalia a flood-control project ket pakairamanan ti pannakipaset ti amin. (Betheena Unite/MANILA BULLETIN)
