Maysa a palagip ti napasamak a pammaltog a nakairamanan ti dua a tinedier iti uneg ti classroom ti Santa Rosa Integrated School (SRIS) iti Barangay Rizal, Santa Rosa, Nueva Ecija idi Huebes, Agosto 7. iti kinapateg ti natibtibker a wagas ti kinatalged ti pagadalan, kinuna ti maysa a nangato nga opisial ti polis idi Biernes, Agosto 8.
Kinuna ni Police Col. Heryl Bruno, provincial director ti Nueva Ecija Police Provincial Office (NEPPO), a ti pammaltog, a nakaigapuan ti pannakasugat nga agpadpada ti biktima ken ti suspek, ket maysa a nakadadanag nga insidente a “mangipalagip kadatayo iti kinapateg ti panangsaluad kadagiti pagadalantayo ken panangkita a napasnek iti emosional ken sikolohikal a pagimbagan dagiti agtutubotayo.”
"Makitintinnulongkami iti pagadalan ken kadagiti nagannak dagiti nairaman nga estudiante tapno maammuan ti gapuna amin daytoy ken tapno malapdan dagiti umasping nga insidente iti masakbayan,” kinuna ni Bruno.
Maysa a 15-anios a babai nga estudiante, a nabigbig laeng a kas "Lea," ti kritikal a kasasaadna gapu iti pannakapaltog ti tengngedna ti maysa nga 18-anios a lalaki (alias "Leo") iti uneg ti classroom-da bayat ti class break.
Farm specialist iti Abra, napaltogan
Mapapati a basta lattan simrek ti suspek, a residente iti Barangay Santo Rosario, iti classroom ti biktima ket segun kadagiti nakasaksi, kellaat a nangiruar iti kalibre .22 a rebolber manipud iti siketna ket pinaltoganna ti biktima, sa kalpasanna pinaltoganna met ti bukodna a bagina.
Segun kadagiti report, dati a girlfriend ti suspek ti biktima.
Naitaray dagiti dua iti kaasitgan nga ospital. Naipadamag a pimmusayen ti suspek 24 nga oras kalpasan ti pammaltog , idinto nga adda pay laeng iti kritikal a kondision ti biktima. (Marilyn Galang/PNA)
