Kinuna ni Sen. Panfilo "Ping" Lacson idi Domingo, Agosto 10, a nakadiskobre iti modus operandi a pakairamanan dagiti kongresman-kontraktor a mabalin a mangnayon iti overpricing wenno substandard construction--wenno agpada--ti flood control ken dadduma pay nga infrastructure projects iti pagilian.
Ti modus, nga inawaganna iti “passing through” (ilalabas) pakairamanan ti masapul a panagbayad ti maysa a kontraktor iti lima agingga iti innem a porsiento iti project cost no mangbangon iti proyekto iti lehislatibo a distrito a yan ti kongresman a kontraktor, wenno dagiti kontraktor a kabagian dagiti kongresman.
Iti interview ti Radio DZBB, kinuna ni Lacson a partikular a pagaammo iti Department of Public Works and Highways (DPWH).
"Kas pagarigan, no ti maysa a kontraktor ket mangbangon iti proyekto iti distrito ti maysa a kongresman a kontraktor wenno addaan kadagiti kabagian a kontraktor, masapul nga agbayad iti lima a porsiento a 'passing through' a fee, a kas iti toll fee,” kinuna ni Lacson.
Retirado a heneral, nakemmeg gapu iti panangsugsog a mangtippuog iti gobierno
"Dayta ket maikissayen manipud iti magastos ti proyekto. Daytoy ket pagaammo ti DPWH," kinunana.
Segun ken ni Lacson, kadawyan a lima a porsiento ti bayad ngem no dadduma, ngumato pay agingga iti innem a porsiento.
"Maibasar iti impormasion a naalami kadagiti kontraktor, nakompromiso ti proyekto. Kasano a mabayadan ti kontraktor no saan nga agusar kadagiti substandard a materiales wenno ag-shortcut? Isu a ti gobierno ngarud ket malugi," kinunana.
Idi masaludsod no mano iti project cost ti aktual a maipan iti proyekto kalpasan a mabayadan dagiti "passing through" a bayad, agraman dagiti buis ken komision a nabayadan, kinuna ti senador a "no dadduma ket nakurang laengen a 40 a porsiento.”
Kas maysa a pagarigan, dinakamat ni Lacson ti "short cut" iti sectioning ti maysa a dike wenno flood control mitigation project, a dagiti espesipikasion ti proyekto ket masapul a 150 a metro, ngem 50 a metro laengen ti leppasen ti kontraktor.
Iti dadduma a kaso, kinunana a saan a suroten ti kontraktor dagiti espesipikasion ti proyekto a mangipalok iti sheet piles iti innem a metro iti daga, ket tallo a metro laengen ti pangipalokanna kadagitoy iti daga.
“Nalaka laeng a madadael ti dike gapu ta naginut ti kontraktor kadagiti material," kinuna ni Lacson.
Dinakamat met ti senador ti sabali pay a kaso ti saanen a pananglaok iti darat iti graba, isu a nakapuy ti pundasion ti proyekto a pangkontrol iti layus.
“No dumteng ti bagyo ket agdinakkel ti karayan, nalaka a madadael ti estruktura gapu ta nakapsut ti pundasionna," kinunana.
Napaliiw met ni Lacson a gapu kadagitoy a fee, mapilitan dagiti kontraktor a mangkissay iti ganansiada iti 10 a porsiento imbes a 15 a porsiento.
Ngem ti nakarkaro ket ti mapukaw a biag ti tao no agpalia dagiti kastoy a proyekto: “Matay dagiti tattao gapu kadagiti layus a gubuayen dagiti bagyo. Dayta ti kadaksan a paset.”
Kinuna ni Lacson a kayatna a makita iti listaan ti DPWH kadagiti flood control project nga insubmitir daytoy iti Malakanyang--ken kayatna met a maammuan no madusa kadi dagiti kongresman-kontraktor no kas isu ti kiddawen ti ebidensia.
“Aktual kadi a madusa ken maidarum dagiti kongresman-kontraktor a masarakan a naglabsing?" sinaludsodna.
Impalgak pay ni Lacson nga adda dagiti kameng ti Kamara nga immawag kenkuana kalpasan a rimmuar dagiti report nga addaan isuna iti listaan ti 67 a kongresman a kontraktor.
"Imbagada kaniak a saan nga amin a kontratada ket iti gobierno, ken kaaduan ket kadagiti pribado a kompania. Nagsakuntipak laeng ket kinunak nga awan ti listaak ken diak ammo nga isuda wenno dagiti kabagianda ket kontraktor agingga nga imbagada a mismo kaniak," kinunana. (Hannah L. Torregoza/MANILA BULLETIN)
