Nakastreken iti Philippine Area of Responsibility (PAR) ti severe tropical storm a napanaganan iti "Gorio" (addaan internasional a nagan a "Podul"), ita a Lunes, Agosto 11, segun iti Philippine Atmospheric, Geophysical and Astronomical Services Administration (PAGASA).
Manipud itay alas 4 iti bigat, addan ni Gorio iti 1,305 a kilometro iti daya ti kapungtuan ti Northern Luzon ket agpalpalaud daytoy iti 25 a kilometro kada oras (kph) nga addaan iti maximum sustained winds a 110 kph iti asideg ti sentrona ken pugso ti angin nga agingga iti 135 kph.
Kinuna ti PAGASA a mabalin a pumigsa pay daytoy ket agbalin a naan-anay a bagyo (typhoon) iti sumaruno a 12 nga oras, sa in-inut a kumapuy bayat nga agtultuloy ti panagturongna iti amianan a laud.
Segun iti weather bureau, saan ketdi a maekspektar a direkta nga apektaran ti Gorio ti ania man a paset ti pagilian iti uneg ti sumaruno a tallo nga aldaw.
44% kadagiti Filipino, mangnamnama iti nasaysayaat a kalidad ti panagbiag iti 2026 —SWS
Nupay kasta, mabalin a maingato iti Tropical Cyclone Wind Signal No. 1 iti kapungtuan a Northern Luzon no agpaabagatan ni Gorio.
Maibatay iti agdama a forecast, mabalin nga ag-landfall ni Gorio iti amianan a daya nga igid-baybay ti Taiwan inton Mierkoles, Agosto 13, ken rummuar iti PAR iti malem ti Mierkoles wenno nasapa a bigat ti Huebes, Agosto 14.
Kinuna ni PAGASA weather specialist Daniel James Villamil a saan met a maekspektar a papigsaen ni Gorio ti southwest monsoon wenno abagat.
Manamnama pay laeng ti nasayaat a paniempo iti kaaduan a paset ti pagilian agingga iti Martes, Agosto 12, nupay adda dagiti naipattok a tudtudo iti malem wenno sardam. (Ellalyn De Vera-Ruiz/MANILA BULLETIN)
