Kinondenar ti Department of National Defense (DND) idi Lunes, Agosto 11, ti dinadarasudos a tignay ti China iti West Philippine Sea (WPS) a nangitunda iti panagdinnungpar ti dua a baporna bayat a kamkamatenda ti bapor ti Philippine Coast Guard (PCG).
Segun ken ni Commodore Jay Tarriela, pannakangiwat ti PCG iti WPS, napasamak ti panagdinnungpar dagiti dua a bapor ti China bayat ti humanitarian mission nga insayangkat ti PCG iti Bajo de Masinloc, maysa a shoal nga adda iti 124 nautical miles iti daya ti Zambales a bambantayan dagiti puersa ti China.
Kinuna ni Tarriela a napasamak ti insidente bayat ti panangted ti PCG (babaen dagiti bapor ti PCG a BRP Teresa Magbanua ken BRP Suluan, ken ti MV Pamamalakaya a pagiluganan kadagiti ikan), iti gasolina ken supply kadagiti 35 a mangngalap iti Bajo de Masinloc babaen ti “Kadiwa Para sa Bagong Bayaning Mangingisda (KBBM).”
Kinuna ni Tarriela a pinaturongan dagiti bapor ti China ti BRP Suluan iti water cannon, ngem nalisian daytoy ti BRP Suluan.
Mapukpukaw a nobia, nasarakan iti Pangasinan
Iti maysa a bideo nga impaskil ti PCG, makita a dandanin maipit ti BRP Suluan iti dua a bapor ti China.
Iti maysa pay a paset ti bideo, makita a nakaparpardas ti bapor ti China Coast Guard (CCG) nga addaan iti bow number “3104” a nangkamat iti BRP Suluan iti 10.5 nautical miles iti daya ti Bajo de Masinloc. Ip-ipusenna ti BRP Suluan idi kellaat a simmabat ti bapor a panggubat ti People’s Liberation Army-Navy (PLA-N) nga addaan tail number “164,” ket nadungparna ti upperdeck iti sango ti bapor ti CCG.
Nagtungpal daytoy iti nakaro a pannakadadael ti sanguanan ti bapor ti China, ket saanen a mabalin nga agbiahe iti baybay.
Iti laksid daytoy, nangidiaya iti tulong ti maysa nga opisial ti BRP Teresa Magbanua kadagiti marino ti CCG-3104 ngem saan a simmungbat dagitoy.
Iti maysa nga statement, inyebkas ti DND ti panangsuportada iti PCG, ket binabalawda ti naranggas ken minamaag nga aramid ti China iti Bajo de Masinloc (Scarborough wenno Panatag Shoal).
Impaganetget ni Sekretario ti DND Gilberto Teodoro Jr. ti natibker a panangirupir ni Presidente Marcos Jr. iti nalawag a kalintegan ti Filipinas iti WPS, a saan nga agsapul iti gubat wenno risiris, ngem aramidenda laeng ti rumbeng nga aramidenda a mangsalaknib iti kalintegan ti Filipinas iti teritoriona.
Nupay napaspasamaken ti panagdinnungpar ti bapor ti China ken Filipinas kadagiti naglabas, daytoy ti umuna a gundaway a mairekord ti PCG ti panagdinnungpar ti mismo a dua a bapor ti China bayat a kamkamatenda ti bapor ti Filipinas iti pagsisinnupiatan a paset ti baybay. (Martin Sadongdong/Manila Bulletin//Lito Hilidon/Bannawag)
