Impaganetget ni Senate President Francis “Chiz” Escudero ita nga aldaw, Agosto 12, nga awan ti ania man a pannakipasetna kadagiti flood control project a naited iti kadakkelan a campaign a donor-na, ket kunana a malisioso ken saan a naintiempuan dagitoy a padamag a pangngepda laeng nga ikkaten iti akemna gapu iti posible a maidatag nga impeachment complaint inton Pebrero 2026.
Itay kallabes, imparangarang ni Presidente Marcos Jr. a ti 20 a porsiento ti dagup ti ₱545 a bilion a flood control projects ket naited kadagiti 15 a contractor, ket lima kadagitoy ti addaan kontrata iti nadumaduma a paset ti Filipinas.
Iti maysa a press briefing, sinungbatan ni Escudero ti maysa a padamag a nangbigbig a ti maysa a contributor-na idi 2022 election ket maysa kadagiti kontraktor a nakipaset iti naanomalia a flood control projects.
Segun ken ni Escudero, awan ti pakainaiganna iti pannakailasin, panangisagana iti program of work, panag-bid, panangipaay, panagbayad, wenno panangsukimat iti ania man a proyekto iti uneg man wenno ruar ti Sorsogon.
Senado, pinasingkedanna ti ₱6.793-trilion a nailian a badiet para 2026
Inaklon ni Escudero nga am-ammona ti kontraktor, a maysa a tubo ti Sorsogon, ngem impaganetgetna a ti ₱5.16 a bilion a nadakamat a proyekto ti kompania ket awan pay maysa a porsientona ti dagup ti pondo a dinakamat ti presidente.
Kinuestionar ni Escudero no apay a dildillawenda ti maysa laeng a porsiento, ket saan a ti 99 a porsiento; ken apay a ti laeng koneksionna kadagiti kontraktor ti kitkitaenda, ket saan a dagiti lehislador wenno opisial ti gobierno a direkta a makibibiang iti pannakikontrata. (Dhel Nazario/Manila Bulletin//Lito Hilidon/Bannawag)
