Ad-adalen ti Land Transportation Franchising and Regulatory Board (LTFRB) ti petision nga impila dagiti dadakkel a grupo ti transportasion nga agkidkiddaw iti pannakaingato ti minimum fare para kadagiti public utility jeepney (PUJ).
Impila dagiti grupo a PASANG MASDA, ALTODAP, ken ACTO ti petisionda idi Lunes, Agosto 11, nga agkidkiddaw iti ₱1 a pannakaingato iti pasahe ken dadduma pay a pamasahe kadagiti tradisional ken modern PUJ.
Iti dagupna, kidkiddawenda nga ideklarar ti LTFRB a kas permanente daydi napatgan a ₱1 a provisional fare hike idi Oktubre 2023, ken anamonganda ti nayon a ₱2 a provisional increase, ket agbalin a ₱15 ti minimum fare kadagiti tradisional a PUJ, manipud iti ₱13.
Iti sabali a bangir, kiniddaw dagiti nagpetision a maingato met ti minimum fare kadagiti modern PUJ manipud ₱12, agbalin a ₱19.
Senado, pinasingkedanna ti ₱6.793-trilion a nailian a badiet para 2026
Segun ken ni LTFRB chairperson Teofilo Guadiz III, ad-adalenda ti kiddaw ti grupo tapno masigurado a patas ken nainkalintegan ti pannakaingato iti pamasahe, ta masapul a timbengenda ti pagimbagan dagiti pasahero ken PUJ operator. (Raymond Carl Dela Cruz/PNA//Lito Hilidon/Bannawag)
